Stjórnarskrá Íraks loks samþykkt

Íraksþing samþykkti í dag síðustu drög að stjórnarskrá landins sem leggja á fyrir þjóðina í þjóðaratkvæðagreiðslu eftir mánuð. Stjórnarskránni verður nú komið til Sameinuðu þjóðanna sem munu prenta fimm milljónir eintaka af henni og dreifa til íbúa landsins. Nokkur styrr hefur staðið um plaggið á írakska þinginu og hafa fulltrúar súnníta, sem eru í minnihluta í landinu, gert margar athugasemdir við hana. Komið hefur verið til móts við nokkrar kröfur þeirra en stjórnarskráin endurspeglar engu að síður að stærstum hluta sjónarmið sjíta og Kúrda sem hafa tryggan meirihluta á þinginu. Varaforseti írakska þingsins sagði í dag að ekki yrðu gerðar frekari breytingar á stjórnarskráinni. Vonast er til þess að Írakar fái fyrstu eintökin í hendur innan nokkurra daga og að prentun fimm miljóna eintaka verði lokið fyrir septemberlok þannig að íbúar landsins hafi nokkurn tíma til þess að kynna sér efni stjórnarskrárinnar, en þjóðaratkvæðagreiðsla um hana fer fram 18. október.