Tveggja íslenskra kvenna saknað

Tveggja íslenskra kvenna er enn saknað eftir náttúruhamfarirnar í suðurhluta Bandaríkjanna. Lilja Ólafsdóttir Hansch, sem saknað var í Mississippi, kom í leitirnar í gærkvöldi. Samkvæmt upplýsingum frá utanríkisráðuneytinu er enn ekki vitað um ferðir tveggja íslenskra kvenna á hamfarasvæðunum í Louisiana í Bandaríkjunum. Á laugardaginn hafði ættingi 75 ára gamallar konu, Karlý Jónu Kristjónsdóttur Legere, samband við ráðuneytið, þar sem ekkert hjafði til hennar spurst, en hún er, ásamt eiginmanni sínum búsett í bænum Diamond Head, skammt frá Biloxi í Louisiana og í um 75 kílómetra fjarlægð frá New Orleans. Hennar hefur verið saknað frá því fellibylurinn Katrín gekk yfir svæðið og hefur hennar verið leitað síðan um helgina. Pétur Ásgeirsson, skristofustjóri í utanríkisráðuneytinu, segir að í morgun hafi ættingi annarrar íslenskrar konu hringt í ráðuneytið þar sem ekkert var vitað um afdrif hennar frá því hamfarirnar dundu yfir. Pétur segir að nafn konunnar verði ekki gefið upp að svo stöddu, en hún er 67 ára og hefur búið í New Orleans undanfarin ár. Lilja Ólafsdóttir Hansch, sem saknað var í Gulfport í Mississippi, þar sem hún var búsett, kom í leitirnar í gærkvöldi, heil á húfi, en annar Íslendingur, sem býr á svæðinu, fór á heimili hennar í gær, og fann hann hana þar ómeidda. Lilja hafði ætlað að flýja fellibylinn Katrínu, en komst ekki burt. Heimili hennar slapp að mestu við skemmdir í hamförunum. Pétur Ásgeirsson segir að skelfilega hafi gengið að ná símasambandi vestur um haf, og til að mynda hafi ekkert samband náðst við ræðismann Íslands í New Orleans frá því fellibylurinn gekk yfir borgina. Pétur Ásgeirsson, skristofustjóri í utanríkisráðuneytinu, segir að leit að konunum sé háttað á  þann veg að formleg leið gagnvart bandarískum stjórnvöldum er sú að sendiráð Íslands í Washington gefur upplýsingar til neyðarmiðstöðvar bandaríska utanríkisráðuneytisins sem tekur við upplýsingum um ríkisborgara allra erlendra ríkja. En einnig er leitað til ræðismanna á svæðinu og í þessu tilfelli er það ræðismaður Íslendinga í Talahassee í Florida sem hefur veitt ákveðna aðstoð. Hann hefur síðan reynt að vera í sambandi við Íslendingasamfélagið á svæðinu og er að reyna að fá upplýsingar. Hann náði siðan í fjölskyldu sem býr á svæðinu að kanna heimili Lilju og það komu upplýsingar í gær að allt væri í lagi með hana.