Evrópulönd rétta fram hjálparhönd

Hörmulegar afleiðingar fellibylsins Katrínar hafa leitt til mikillar samúðar annarra landa í heiminum, sem nú keppast við að bjóða fram aðstoð sína. Evrópulönd hafa brugðist skjótt við hjálparbeiðni frá Bandaríkjunum um að útvega fórnarlömbum fellibylsins alls kyns hjálpargögn eins og tankbíla til flutnings á drykkjarvatni, sjúkrakassa, matarbirgðir, teppi og gúmmíbáta. Á vegum Evrópusambandsins var í gær verið að skipuleggja ferðir með vörurnar eftir að stjórnvöld í Washington lögðu fram formlega hjálparbeiðni til Evrópuþjóðanna, en slíkar beiðnir eru afar sjaldgæfar. Höfuðstöðvar Atlantshafsbandalagsins höfðu einnig fengið beiðni frá Washington um að útvega aðstoð. Tilkynning kom frá Spáni, Belgíu, Bretlandi, Þýskalandi og Ítalíu um að hjálpargögn og sérfræðingar væru þegar á leiðinni vestur um haf. Auk þess hafa fjölmörg önnur lönd álfunnar boðið fram hjálp, þar á meðal Ísland. Aðstoð Íslendinga var þó ekki þegin í bili.