Aðeins kröfur en ekki hótanir

Evrópusambandið krefst þess að Íranar hætti starfsemi í kjarnorkuverum landsins en eitt þeirra var endurræst í gær. Engu er hins vegar hótað verði ekki brugðist við kröfunum. Drög að ályktun hafa verið kynnt hjá Alþjóðakjarnorkumálastofnuninni þar sem þess er krafist að Íranar loki aftur kjarnorkuverinu í Isfahan sem var endurræst í gær. Enn fremur er þess krafist að fulltrúar stofnunarinnar gangi úr skugga um að Íranar hlíti tilmælum stofnunarinnar. Það er Evrópusamabandið með Breta, Frakka og Þjóðverja í broddi fylkingar sem vill að Alþjóðakjarnorkumálastofnunin þrýsti á Írana er ljóst er að Bandaríkjamenn eru á sömu línu. Í ljósi yfirlýsinga í aðdraganda atburða gærdagsins virðist yfirlýsingin hins vegar hálfbitlaus. Því er til dæmis ekki hótað að málinu verði vísað til Öryggisráðs Sameinuðu þjóðanna sem gæti sett viðskiptabann á Íran. Bregðist Íranar ekki við tilmælum Alþjóðakjarnorkumálastofnunarinnar hafa höfundar ályktunartillögunnar látið að því liggja að málinu verði vísað til Öryggisráðsins í september. Íranar hafa í raun þegar svarað umkvörtunum stofnunarinnar og segja það út í hött að loka kjarnorkuverinu aftur. Í raun hafi árangurslausar viðræður við Evrópusambandið undanfarna mánuði sýnt það betur en nokkuð annað að það hafi ekki skilað Írönum neinu að loka verinu til að byrja með.