Styður Menningarnótt næstu þrjú ár

Landsbankinn er orðinn máttarstólpi Menningarnætur en bankinn ætlar að styrkja næstu þrjá viðburði um 7 milljónir króna og var samningur þess efnis undirritaður í dag á tilfinningatorginu í miðbæ Reykjavíkur. Ekkert skorti á tilfinningarnar á milli borgarstjóra og formanns bankaráðs Landsbankans. Samningur milli Reykjavíkurborgar og Landsbankans, sem skrifað var undir í dag, hljóðar upp á sjö milljóna króna styrk bankans fyrir næstu þrjár Menninganætur. Landsbankinn hefur lengi verið aðalstyrktaraðili Menningarnætur sem er orðinn fastur liður í lífi margra Íslendinga og ein fjölmennasta útihátíð ársins. Enn er rúm vika í Menningarnótt, sem haldin verður þann 20. ágúst, og því lítið hægt að spá um veður. Steinunn Valdís Óskarsdóttir borgarstjóri segir veðrið þó engu máli skipta. Þetta sé spurning um hugarástand og fólk klæði sig bara eftir veðri. Aðspurð hvernig henni lítist á að hafa Dani Íslendingum við hlið á þessari Menningarnótt segir Steinunn Valdís að henni finnist það skemmtilegt og hún hlakki til að fá Kaupmannahöfn til Reykjavíkur sem gestasveitarfélag. Hornafjörður og Vestmannaeyjar eru meðal þeirra sem áður hafa verið gestasveitafélög borgarinnar á þessum viðburði en í ár verða það Danir í tilefni þess að þetta er tíunda hátíðin sem haldin er í borginni.  Landsbankinn hefur stutt við bak margra listamanna á Íslandi og má þar nefna Sinfóníuhljómsveitina, Listdansfélagið og Þjóðleikhúsið sem og viðburði eins og Listahátíð Reykjavíkur og síðast en ekki síst Menningarnótt. Aðspurður hvort einhverjir peningar væru eftir í bankanum svaraði Björgólfur því að það væru alltaf nægir peningar í góð málefni.