Mexíkó næst í röðinni

Tæplega þriggja metra háar öldur hafa skollið á Jamaíku og eyðilagt tugi húsa eftir að fellibylurinn Emily gekk þar yfir í nótt. Búist er við að óveðrið skelli á Cancun í Mexíkó í fyrramálið en fréttastofan hefur heimildir fyrir að hópur íslenskra unglinga sé á staðnum. Þrjátíu þúsund ferðamönnum hefur verið skipað að yfirgefa svæðið. Aðeins hefur verið tilkynnt um eitt mannfall vegna fellibylsins Emily sem gengið hefur yfir Karabíska hafið að undanförnu. Í nótt fór Emily um eyjuna Jamaíka og eyðilagði fjölda húsa. Fellibylurinn fór á um 250 kílómetra hraða á klukkustund og mynduðust allt að þriggja metra háar öldur sem skullu á eyjunni í nótt. Miklar rigningar urðu í kjölfarið og hefur hætta á flóðum aukist mjög. Líklegt þykir að Emily sé nú á leið að Cayman-eyjum og hafa hundruð manna þar flúið heimili sín. Sett hafa verið upp skýli fyrir allt að fjögur þúsund manns víðs vegar um eyjarnar og hefur útgöngubann verið komið á. Fellibylir eru tíðir í Karabíska hafinu og eru menn víðs vegar um svæðið í viðbragðsstöðu, meðal annars í Mexíkó þar sem allt að 85 þúsund manns hafa yfirgefið heimili sín og hafa ferðamenn einnig verið beðnir um að yfirgefa svæðið sem fyrst.