Fimm mánaða gíslingu lokið

Franska blaðakonan Florence Aubenas kom heim til Frakklands í gær eftir fimm mánaða gíslingu í Írak ásamt aðstoðarmanni sínum. Aubenas var alls 157 daga í gíslingu en fyrrum utanríkisráðherra, Michel Barnier, sem vann í málinu þangað til fyrir mánuði, sagði að Frakkar hefðu ekki greitt neitt lausnargjald fyrir blaðakonuna. Stuðningsmenn Aubenas skipulögðu partí í gærkvöldi á Place de la Republique torginu í Austur-París þar sem stórar myndir af henni voru hengdar út um allt. Aðstoðarmaður Aubenas, Al-Saadi, sneri aftur í heimabæ sinn í Suðaustur-Bagdad þar sem á var slátrað honum til heiðurs. Frönsk yfirvöld hafa ekki borið kennsl á mannræningjana en rúmenskur blaðamaður, Ovidiu Ohanesian, sem var haldið í gíslingu í tvo mánuði í landinu, varpaði ljósi á málið í gær. Honum var haldið í gíslingu í 51 dag í klefanum við hliðina á Aubenas en Ohanesian var sleppt af hópi sem kallar sig Maadh Bin Jabal.