Rafsanjani nýtur mest fylgis

Rafsanjani, fyrrverandi forseti Írans, nýtur mest fylgis fyrir forsetakosningar sem fram fara í landinu í næstu viku samkvæmt skoðanakönnun fréttastofunnar IRNA sem birt var í dag. 27,1 prósent landsmanna styður Rafsanjani, sem kýs aukin samskipti við Vesturlönd, en á eftir honum kemur annar umbótasinni, Mustafa Moin, með tæplega 19 prósenta fylgi. Hann hefur haft sætaskipti við fyrrverandi lögreglustjórann Mohammad Qalibaf sem er með 16,5 prósenta fylgi. Qalibaf þykir íhaldsamari en bæði Rafsanjani og Moin og hafa harðlínumenn hvatt aðra íhaldssama frambjóðendur til að draga sig í hlé til að lögreglustjórinn sigri umbótasinnana. Forsetakosningarnar fara fram á föstudaginn kemur en ljóst þykir að kosið verður aftur milli þeirra tveggja sem fá mest fylgi því enginn frambjóðendanna er nálægt því fimmtíu prósenta fylgi sem frambjóðandi þarf að hafa til að verða forseti Írans.