Rændu gesti á baðströnd í Portúgal

Um fimm hundruð ungmenni hafa valdið óróleika meðal gesta á strönd í nágrenni Lissabon, höfuðborgar Portúgals, með því að fara ránshendi um eigur þeirra. Mikill fjöldi var á Carcavelos-ströndinni í gær þar sem Portúgalir fögnuðu þjóðhátíðardegi sínum en sú gleði var skammvinn þar sem ungmennin réðust gegn fólkinu og heimtuðu eigur þess. Lögreglan á staðnum reyndi að hrekja múginn á brott en hafði ekki erindi sem erfiði og varð því að kalla á liðsauka úr næstu bæjum. Til átaka kom á milli hópsins og lögreglunnar og meiddust fimm manns, þar á meðal tveir lögreglumenn, lítillega en fjórir voru handteknir á staðnum. Yfirvöld telja að ungmennin, sem voru á aldrinum 12-20 ára, séu úr fátækrahverfum Lissabon.