Felldu verkamenn í rútu

Byssumenn myrtu tíu verkamenn og særðu þrjá þegar þeir skutu á rútu suður af Bagdad í morgun. Rútan var á leið frá bænum Hilla í Suður-Írak til höfuðborgarinnar þegar tveimur bílum var ekið upp að sitthvorri hlið rútunnar og hófu byssumennirnir skothríð í kjölfarið. Ástæður árásarinnar eru ókunnar. Dagurinn í dag hefur verið blóðugur í Írak því tilræðsimaður í lögreglubúningi drap átta lögreglumenn og særði marga þegar hann sprengdi sig í loft upp í höfuðstöðvum lögreglunnar í Bagdad. Þá létust ellefu til viðbótar og 29 særðust þegar bílsprengja sprakk við veitingastað á fjölfarinni götu í miðborg Bagdad. Rúmlega 800 manns hafa látist í árásum uppreisnarmanna í Írak frá því að ný ríkisstjórn tók við í landinu í lok apríl.