Keyrði á ofsahraða undir flugvélar

Ökumaður fólksbifreiðar setti allt á annan enda á Alþjóðaflugvellinum á Kýpur í dag þegar hann ók bifreiðinni inn á flugbraut vallarins. Starfsmenn í flugturninum komu auga á bifreiðina sem var ekið undir kyrrstæðar farþegaflugvélar á ofsahraða og síðan inn á flugbrautina. Á sama tíma lenti þota kýpverksa flugfélagsins á vellinum og þegar flugmaðurinn ók henni að flugstöðvarbyggingunni kom fólksbíllinn æðandi á móti. Flugmaðurinn segir ekkert annað hafa verið í stöðunni en að víkja fyrir bifreiðinni. Við yfirheyrslu kom í ljós að ökumaðurinn, sem er þrítugur Grikki, var á flótta. Hann varð uppvís að því að stela smákökum úr bakaríi í grennd við flugvöllinn og valdi sér þessa óvenjulega flóttaleið.