Íslendingar vilja út úr Stoke

"Það er ekki hægt annað en að líta á þessa fjárfestingu sem slæma þar sem hún hefur ekki gefið neinn arð. Þetta er lélegasta fjárfesting sem ég hef farið í síðustu tíu árin," sagði Magnús Kristinsson, útgerðarmaður í Vestmannaeyjum og stjórnarformaður Stoke Holding, í samtali við Fréttablaðið í gær. Auk þess að vera sá aðili sem sett hefur mestan pening í Stoke City á síðustu árum sá Magnús um að koma á laggirnir fjárfestingarfyrirtækinu Stoke Holding, sem stofnað var árið 1999 í þeim tilgangi að hafa umsjón með yfirtöku íslenskra fjárfesta á enska knattspyrnufélaginu Stoke City. Nú, sex árum síðar, hefur Magnús misst áhugann á félaginu og hefur hann auglýst félagið til sölu. "Ég mun ekki eyða meiri pening í þetta félag á meðan Tony Pulis er við stjórn," segir Magnús en Pulis var endurráðinn sem stjóri félagsins til eins árs í síðustu viku. Í viðtali við staðarblaðið í Stoke, The Sentinel, sem birtist í gærmorgun lýsir Magnús yfir megnri óánægju yfir þeirri ákvörðun íslensku stjórnarinnar að endurráða Pulis. "Pulis hefur ekki verið að vinna með okkur og hefur alltaf lýst því yfir að hann ætli sér að nota sína leikmenn," sagði Magnús við blaðið og vísar þar til stöðu Þórðar Guðjónssonar hjá félaginu en hann fær nánast engin tækifæri hjá Pulis þar sem einu haldbæru rökin virðast vera sú að Þórður sé Íslendingur. "Öll ánægjan af þessu starfi mínu er horfin. Ástríðan er ekki fyrir hendi lengur," sagði Magnús en ítrekaði að hann væri að tala fyrir sjálfan sig en ekki fyrir hönd annarra stjórnarmanna í Stoke Holding. Þrátt fyrir að vera ósammála stjórn félagsins um að ráða Tony Pulis ber Magnús stjórnarformanninum Gunnari Þór Gíslasyni vel söguna og segir Magnús hann hafa lagt hjarta sitt og sál í félagið á undanförnum árum. Gunnar Þór sagði í samtali við Fréttablaðið í gær að Magnús hefði heilmikið fyrir sér í þessu máli og kveðst hann virða skoðun hans. "Hans hugsjón um að Stoke sé stökkpallur fyrir íslenska knattspyrnumenn í ensku knattspyrnuna er ekki að rætast og það er því fullkomlega eðlilegt að hann sé óánægður. Það er hans réttur að ákveða að setja ekki meiri pening í félagið og auðvitað setur sú ákvörðun Stoke í mikinn vanda. Ef ekki finnst einhver annar til að setja pening í félagið er ljóst að það þarf að draga saman seglin," sagði Gunnar Þór. Ekki er hægt að lesa annað af orðum beggja en að hin íslensku tengsl við félagið séu senn að rofna. Aðalfundur Stoke fer fram á Brittania-vellinum í Stoke á laugardaginn og mun Gunnar Þór þá tilkynna stuðningsmönnum og öðrum sem koma að félaginu að Stoke City sé til sölu. Má gera ráð fyrir að þær fréttir muni vekja töluverða athygli í breska knattspyrnuheiminum enda þykja það ávallt mikil tíðindi þegar hátt skrifað knattspyrnufélag hefur hug á að breyta eignarhaldinu. Magnús sagðist í samtali við Fréttablaðið ekki vita hvort bréfin væru söluvara eða ekki en Stoke væri mjög spennandi félag fyrir góða fjárfesta. "Þetta er félag sem er betur rekið en mörg önnur í Englandi," segir hann. Án þess að nefna nokkrar tölur segist Magnús hafa sett mikinn pening í félagið á þessum sex árum. Spurður um hvort hann sjái eftir þeim peningum segir Magnús ekki svo vera. "Nei, nei. Ég reyni alltaf að hafa gaman af lífinu." vignir@frettabladid.is