Herflutningar hefjast í dag

Sýrlendingar munu hefja flutninga á hersveitum sínum í Líbanon í dag. Líbanska stjórnarandstaðan er vantrúuð á að þær fari frá landinu í bráð. Bashar Assad, forseti Sýrlands, boðaði í ræðu á sýrlenska þinginu á laugardaginn að 14.000 manna herlið landsins sem staðsett er í Líbanon yrði kallað heim í áföngum. Liður í þeirri áætlun er flutningur hermanna frá norðurhluta landsins til Bekaa-dalsins sem er við landamæri Sýrlands og hefjast flutningarnir í dag. Stjórnarandstæðingar í Líbanon eru hins vegar ekki sannfærðir um að Sýrlendingar muni draga sveitir sínar úr landinu að sinni. "Ræða Assad var fyrst og fremst pólitísk yfirlýsing. Við bíðum hins vegar eftir því að hann framfylgi áformum sínum," sagði líbanskur stjórnmálamaður í samtali við AP-fréttastofuna í gær. Hassan Nasrallah, leiðtogi Hizbollah-samtakanna, sagði á blaðamannafundi í gær að samtökin myndu ekki afvopnast á meðan hætta steðjaði að landinu frá Ísraelsmönnum.