Skipverjum á Sléttbaki sagt upp

Skipverjum á togaranum Sléttbaki frá Akureyri var öllum sagt upp í gærkvöldi því líkur eru á að skipið verði selt innan tíðar. 38 manns eru í áhöfn skipsins og var þeim öllum afhent uppsagnarbréf í gærkvöldi, skömmu áður en lagt var upp í túr. Sléttbakur er í eigu Brims og segir Gunnar Gunnarsson, útgerðarstjóri hjá fyrirtækinu, að mjög gott tilboð hafi borist í skipið nýlega og atburðarásin sem fylgdi hafi verið hröð. Tilboðið kom frá fjárfestum í Kanada og að sögn Gunnars mun að líkindum verða gengið frá kaupunum áður en langt um líður en þó ekki fyrr en í fyrsta lagi eftir rúman mánuð þegar togarinn kemur aftur úr túrnum sem lagt var upp í í gærkvöldi. Gunnar segir ekki ljóst á þessari stundu hvort einhverjum úr áhöfninni bjóðast önnur störf hjá útgerðarfyrirtækinu. Brim rekur nú fimm skip að frátöldum Sléttbaki og að sögn Gunnars lítur ekki út fyrir að þau verði seld á næstunni.