Cantoni kemur heim

Ítalski hjálparstarfsmaðurinn Clementina Cantoni sneri í dag til heimalands síns en henni var í gær sleppt úr haldi mannræningja í Afganistan. Cantoni lenti á Ciampino-flugvelli í Róm nú síðdegis og var Silvio Berlusconi, forsætisráðherra Ítalíu, meðal þeirra sem tóku á móti henni, en heimkoman var sýnd í beinni útsendingu í ítölsku sjónvarpi. Cantoni virtist við góða heilsu og hefur hún greint ítölskum fjölmiðlum frá því að komið hafi verið vel fram við hana og að konur hafi gætt hennar í gíslingunni. Cantoni var rænt 16. maí síðastliðinn í miðborg Kabúl og því var hún í rúmar þrjár vikur í gíslingu. Afganska ríkisstjórnin segir að glæpamenn en ekki íslamskir uppreisnarmenn hafi haft hana í haldi en hefur ekki veitt frekari upplýsingar um mannræningjana. Ítalska stjórnin neitar að lausnargjald hafi verið greitt fyrir Cantoni en ítölsk dagblöð segja að Ítalir hafi sannfært afgönsk stjórnvöld um að sleppa fjórum föngum í skiptum fyrir Cantoni auk þess sem einhver fjárhæð hafi verið reidd af hendi. Clementina Cantoni hafði starfað fyrir hjálparsamtökin CARE International í þrjú ár í Afganistan við að hjálpa fátækjum ekkjum þegar henni var rænt en í kjölfar ránsins efndu margar þeirra til útifunda þar sem krafist var lausnar Cantoni.