Baktjaldamakk og valdabrölt

Séra Hjalti Þorkelsson skólastjóri Landakotsskóla sagði af sér á föstudag vegna samstarfsörðugleika við skólanefnd. Afsögnin er afleiðing illinda sem skekið hafa skólann undanfarna mánuði. Samkvæmt bókun á kennarafundi í Landakotsskóla frá 1. mars gengu kennararáðsfulltrúarnir Guðbjörg Magnúsdóttir, Helga Guðrún Loftsdóttir og Irena Kojic á fund skólanefndar þann 28. janúar síðastliðinn og lögðu fram athugasemdir þar sem "gróflega er vegið að starfsheiðri og orðstír skólastjóra, aðstoðarskólastjóra og nokkurra nafngreindra kennara við skólann." Í bókuninni kemur fram að kennararáðsfulltrúarnir hafi farið langt út fyrir þann ramma sem kennararáði er ætlað að starfa eftir. Lýst var yfir vantrausti á kennararáðsfulltrúanna og skorað á þá að segja af sér með öllum greiddum atkvæðum. Á fundi með kennararáði 14. febrúar krafðist Hjalti Þorkelsson skólastjóri þess að fá afhent öll gögn sem lögð voru fram á fundi kennararáðs með skólanefnd 28 janúar. í kjölfarið fékk Hjalti sendan útdrátt úr minnispunktum fundarins frá ritara skólanefndar en Hjalti krafðist þess að fá óbreytt eintak af minnispunktunum. Skólanefnd varð ekki við ósk Hjalta. Kennarar við skólann óskuðu einnig eftir því að fá óbreytt eintak af minnispunktunum en fengu þau svör frá kennararáði að minnispunktarnir væru glataðir. Kennararnir kærðu athæfi kennararáðs til úrskurðarnefndar upplýsingamála í forsætisráðuneytinu. Í kjölfarið mögnuðust deilurnar sem enduðu með því að skólanefnd sagði Bessí Jóhannsdóttur aðstoðarskólastjóra upp störfum og rökstuddi uppsögnina með sparnaðaraðgerðum. Með uppsögn Bessíar taldi Hjalti skólastjóri að skólanefnd hefði stigið inn á valdsvið sitt sem skólastjóra og við það gat hann ekki unað. Skólastjórn Landakotsskóla sendi frá sér yfirlýsingu í gær þar sem því er lýst yfir að full samstaða sé milli stjórnar og kennararáðs um áframhaldandi skólastarf. Gunnar Örn Ólafsson formaður skólanefndar Landakotsskóla sagði að foreldrar yrðu kallaðir á fund með skólanefnd í vikunni.