Skotíþróttamenn lang­eygir eftir starfs­leyfi

Í pistli sem birtur var á vef Skotfélagsins í gær eru nokkur af þessum verkefnum nefnd, eins og þjálfun skotíþróttafólks, æfingar og próftökur fyrir veiði, verkleg þjálfun fyrir tilvonandi byssuleyfishafa og alþjóðlegt mótahald.

Þar segir einnig að félagsmenn í Skotfélagi Reykjavíkur séu 1.800 talsins en mun fleiri hafi sótt svæðið, þar sem það hefur verið opið öllum sem vilja æfa sig, án tillits til félagsaðildar.

„SKOTREYN er í sömu stöðu í nágrenni við okkur og til skammar fyrir Reykjavíkurborg að vera ekki búin að taka af skarið og sjá til þess að sjálfboðaliðarekin íþróttafélög þurfi ekki að eyða öllum sínum tíma í að berja á hinu opinbera í stað þess að vera að efla íþróttastarf í landinu,“ segir í pistlinum.

Þá eru embættismenn og kjörnir fulltrúar hvattir til að grípa til aðgerða.

Starfsleyfi skotvallarins var fellt úr gildi í október í fyrra en lengi hefur verið deilt um svæðið, þó skotvöllurinn hafi verið rekinn þar í meira en áratug. Það var úrskurðarnefnd sem felldi úr gildi ákvörðun Heilbrigðiseftirlits Reykjavíkur um að samþykkja starfsleyfið á þeim grunni að eftirlitið hefði átt að krefjast þess að hljóðmælingar færu fram á vellinum.

Sjá einnig: Starfsleyfi skotvallar á Álfsnesi enn á ný fellt úr gildi

Búið er að grípa til mikilla umbóta á svæði Skotfélags Reykjavíkur á undanförnum árum. Þá hafa verið framkvæmdar hljóðmælingar. Verkfræðistofan VERKÍS var fengin til að vinna skýrslu um hljóðmengun frá svæðinu í ágúst í fyrra en í pistlinum segir að hljóðmengunin hafi ávallt verið innan leyfilegra marka.