Vilja heilsulind að Nesjavöllum

Til stendur að hefja rekstur heilsulindar í ætt við þá sem rekin er í Hveragerði, á Nesjavöllum. Orkuveita Reykjavíkur á í samningaviðræðum við félag sem vill nýta jarðvarmann þar og segja forsvarsmenn félagsins að gangi allt vel, geti framkvæmdir hafist á næsta ári. Fyrir rétt rúmu ári samþykkti stjórn Orkuveitu Reykjavíkur að leita eftir samstarfsaðila við þróun landnýtingar á Nesjavöllum. Þrír sóttu um, rætt var við tvo og að lokum var einn valinn, en það er félag í eigu þeirra Guðmundar Björnssonar læknis, sem rak heilsulind í Kópavogi um nokkurt skeið, og Guðmundar Halldórssonar, hótelhaldara að Nesjavöllum. Guðmundur Þóroddsson, forstjóri Orkuveitu Reykjavíkur, segir Orkuveituna vera með starfsemi á Nesjavöllum þar sem hún sé með heitt og kalt vatn og eigi land. Hlutverk hennar sé að selja vatnið og leigja landið og annað sé ekki ráðgert af hálfu fyrirtækisins þar. Guðmundur segir Orkuveituna ekki munu leggja fé í verkefnið en það eigi eftir að semja endanlega um leiguna og verð á vatninu. Hann segist reikna með því að tekjurnar verði töluverðar ef verkefnið fari af stað og verði að einhverju skemmtilegu. Nú er rekið heilsárshótel í gömlu starfsmannahúsunum en heilsuhótel og lón yrðu nokkuð frá virkjuninni, í kringum Nesbúð og þar fyrir neðan. Það lá þoka yfir svæðinu í dag og þegar gufan frá virkjuninni bætist við er erfitt um vik að sína fjarlægðir. Lækurinn á svæðinu er volgur um þessar mundir en starfsfólkið í Nesbúð segir að ferðamenn eigi það til á góðviðrisdögum að skella sér út í og baða sig. Orkuveitumenn eru því greinilega ekki þeir fyrstu sem dettur í hug að gera þarna baðstað. Guðmundur Björnsson, annar Guðmundanna sem hyggjast ráðast í þetta verkefni, segir hugmyndina vera að byggja þarna upp heilsulind, frekar í ætt við þá starfsemi sem rekin er í Hveragerði en í Bláa lóninu. Þar komi fólk til lengri dvalar og meðferðar en ekki bara til að baða sig. Lónið verði þó opið almenningi. Enn má þó segja að hugmyndirnar séu á frumstigi en Guðmundur segir að ef allt gangi sé mögulegt að hefja framkvæmdir á næst ári. Eins og kunnugt er hyggst Orkuveitan einnig byggja upp frístundabyggð á landi sínu við Úlfljótsvatn. Í ljósi þessara hugmynda óskaði Guðlaugur Þór Þórðarson, borgarfulltrúi Sjálfstæðisflokksins, eftir utandagskrárumræðu um fjárfestingar Orkuveitunnar fyrir utan hefðbundna starfsemi fyrirtækisins á borgarstjórnarfundi í dag.