Hætta ekki kjarnorkuframleiðslu

Mahmoud Ahmadinejad sagði í ræðu sinni á þinginu að Íranar hefðu fullan rétt á því að framleiða kjarnorku og þvertók fyrir að þjóðin hyggðist framleiða kjarnorkuvopn. Því til sönnunar bauð han erlendum ríkjum og fyrirtækjum að taka þátt í kjarnorkuframleiðslu Írana. Bandaríkjamenn saka Írani um að segjast framleiðla kjarnorku til orkunota í því skyni að breiða yfir kjarnorkuvopnaframleiðslu og vilja vísa málinu til Öryggisráðs Sameinuðu þjóðanna. Bandaríkjamenn og Evrópuþjóðir krefjast þess að Íranir hætti framleiðslu á auðguðu úraníumi ellegar verði viðskiptahindrunum beitt. Málið verður tekið fyrir á fundi Alþjóðakjarnorkumálastofnunarinnar sem fer fram í Vín síðar í vikunni. Ekki er talið líklegt að stofnunin samþykki að grípa til harða aðgerða gegn Íran.