Naumur sigur stjórnarandstöðu

Kristilegir demókratar, flokkur Angelu Merkel, fá flest atkvæði í þingkosningunum í Þýskalandi en ekki nóg til þess að mynda stjórn hægri- og miðflokka, ef marka má útgönguspár sem birtar voru í Þýskalandi fyrir stundu. Stjórn Gerhards Schröders virði því fallin en möguleikar á stjórnarmyndun eru ekki margir.  Kjörstöðum var lokað klukkan sex að þýskum tíma, klukkan fjögur að íslenskum tíma, og samkvæmt útgönguspá á vegum sjónvarpsstöðvarinnar ARD fá Kristilegir demókratar, CDU, og systurflokkurinn CSU samtals 35,5 prósent atkvæða. Frjálsir demókratar, sem Merkel sóttist eftir að mynda stjórn með, fá hins vegar 10,5 prósent og það nægir ekki til að mynda meirihluta á þingi. Samkvæmt sömu útgönguspá fá Jafnaðarmenn, flokkur Gerhards Schröders, 34 prósent, samstarfsflokkurinn Græningjar 8,5 prósent og Vinstriflokkurinn 7,5 prósent. Líklegt er talið að Angela Merkel verði næsti kanslari Þýskalands miðað við þessa niðurstöðu en stjórnarmyndunarmöguleikar eru ekki margir. Svo gæti farið að kristilegir demókratar yrðu að mynda stjórn með jafnaðarmönnum, svokallaða stóru samsteypu, en slíkt er talið dauðadómur yfir áformum Merkel um umbætur á vinnumarkaði og skattalöggjöf sem ætlað er að blása lífi í þýskt efnahagslíf. Talning atkvæða í Þýskalandi er þegar hafin en endanlegar niðurstöður kosninganna munu ekki liggja fyrir fyrr en eftir miðnætti í Þýskalandi.