Hermönnum fjölgað ef þurfa þykir

Bresk yfirvöld greindu frá því í dag að þau myndu fjölga hermönnum í Írak ef þörf væri á, en ótti manna við borgarastyrjöld í landinu fer vaxandi. Í sjónvarpsviðtali í dag sagði John Reid, varnarmálaráðherra Bretlands, að ekki væri þörf á meiri mannskap þessa stundina en ef ástandið í Írak versnaði yrði hermönnum fjölgað. Yfirlýsingin kemur í kjölfar frétta í Sunday Telegraph í dag um að stjórnvöld í Bretlandi hafi neyðst til að hætta við að kalla hluta af hermönnunum sínum heim frá Írak vegna vaxandi ólgu í landinu. Varnarmálaráðuneytið neitar þessu og segir enga áætlun liggja fyrir um brottflutning breskra hermanna. Bresk stjórnvöld hafa sætt harðri gagnrýni fyrir aðild sína að Íraksstríðinu, en alls eru um 8500 breskir hermenn í Írak nú um stundir.