Íranar haldi áfram framleiðslu

Forseti Írans varði rétt Írana til þess að framleiða kjarnorku þegar hann ávarpaði allsherjarþing Sameinuðu þjóðanna í gær. Vonir manna um sátt í kjarnorkudeilu Írana og vesturveldanna dvínuðu við það og er hugsanlegt að málinu verði skotið til öryggisráðs Sameinuðu þjóðanna. Ræðu Mahmouds Ahmadinejads, forseta Írans, var beðið með nokkurri eftirvæntingu enda búist við að hann legði fram tillögu um lausn í deilu Írana við Bandaríkin og Evrópusambandið um kjarnorkuvopnaáætlun sína. Bandaríkin saka Írana um að reyna að nota áætlunina til þess að koma sér upp kjarnavopnum en Íranar vísa því á bug. Condoloeezza Rice, utanríkisráðherra Bandaríkjanna, hvatti Írana, í ávarpi sínu til allsherjarþings Sameimuðu þjóðanna, til að leggja kjarnorkuáætlun sína á hilluna auk þess sem Kofi Annan, framkvæmdastjóri samtakanna, varaði við útbreiðslu kjarnavopna. Forseti Írans sagði hins vegar þjóð sína vera í fullum rétti til þess að framleiða kjarnorku og gagnrýndi það sem hann kallaði kjarnorkuaðskilnaðarstefnu þar sem sumum löndum væri heimilt að auðga úran en öðrum ekki. Hann sagði enn fremur að íslam hindraði það að Íranar gætu komið sér upp kjarnorkuvopnum. Íranar féllust á að hætta vinnslu úrans í nóvember í fyrra, en hófu hana aftur fyrir nokkrum vikum. Jack Straw utanríkisráðherra Bretlands, segir að ræða forseta Írans hafi valdið vonbrigðum. Stjórn Alþjóðakjarnorkumálastofnunarinnar kemur saman í Vín á morgun til að ræða stöðuna og er hugsanlegt að Bandaríkin og ESB standi þá við þá hótun sína að vísa málinu til öryggisráðs Sameinuðu þjóðanna.