Blair og Pútín funda

Tony Blair, forsætisráðherra Bretlands, sótti Vladimir Pútín, Rússlandsforseta, heim í gær. Niðurfelling skulda þróunarlandanna og umhverfismál voru þar ofarlega á baugi. Í kjölfar fundarins hélt svo Blair til Þýskalands þar sem hann hitti Gerhard Schröder, kanslara. Fundur Blairs og Pútíns í gær er liður í ferð þess fyrrnefnda fyrir leiðtogafund átta helstu iðnríkja heims í Gleneagles, Skotlandi, sem haldinn verður í byrjun júlímánaðar. Þar hyggst Blair berjast fyrir því að þróunaraðstoð við Afríkuríkin verði tvöfölduð og ná samkomulagi um að spornað verði við gróðurhúsaáhrifum. Leiðtogarnir tveir ræddu þessi mál í bænum Novo-Ogaryovo, skammt utan við Moskvu í gær og virtist fara vel á með þeim. Ekki er langt síðan að Rússar skrifuðu undir Kyoto-bókunina og skuldbundu sig þar með til að draga úr losun gróðurhúsalofttegunda. Því vonast Bretar til að Rússar verði þeim drjúgur bandamaður í því að sannfæra Bandaríkjamenn um að bregðast verði við hlýnun jarðar með einhverjum hætti. Hins vegar hefur verið grunnt á því góða á meðal þjóðanna á síðustu misserum, meðal annars vegna Íraks og sökum þess að Bretar hafa veitt andstæðingum Pútíns hæli í landinu, til dæmis auðjöfrinum Boris Berezovsky og Akhmed Zakayev, hægri handar Aslan Maskadovs, fyrrum leiðtoga Tsjetsjena. Þeir Pútín og Blair ræddu við blaðamenn að loknum fundinum og voru málefni fyrrum Sovétlýðveldanna þar til umræðu en róstusamt hefur verið þar undanfarna mánuði, eins og atburðirnir í Úkraínu, Kirgisistan og Úsbekistan eru dæmi um. Pútín sagði að Rússland og Vesturveldin ættu að vinna saman að því að gera þennan heimshluta stöðugri en ekki keppast um áhrif í honum. Síðdegis hélt Blair svo til Berlínar til fundar við Gerhard Schröder, kanslara. Í dag eru svo fyrirhugaðir fundir við leiðtoga Lúxemborgar og Frakklands. Þær viðræður munu hins vegar öðru fremur snúast um þær ógöngur sem Evrópusambandið er komið í eftir úrslit þjóðaratkvæðagreiðslna í Frakklandi og Hollandi um stjórnarskrársáttmála ESB.