Lokað fyrir vatn í Harbin vegna sprengingar í efnaverksmiðju

Mikil skelfing greip um sig meðal íbúa í Harbin, einni af stærstu borgum Kína, þegar ákveðið var að loka fyrir vatnsrennsli vegna sprengingar í efnaverksmiðju á dögunum sem varð fimm manns að bana. Til þess ð tryggja öryggi íbúa borgarinnar var ákveðið að skrúfa fyrir vatnið í fjóra daga.

Verksmiðjan er við ána Songhua sem borgin Harbin liggur einnig við. Ekki hefur orðið vart við neitt óvenjulegt í ánni en talið er öruggara að skrúfa fyrir vatnið þar sem mengun getur komið fram á næstu dögum. Íbúar borgarinnar eru yfir átta milljón talsins. Hefur fólk hamstrað vatn og mat frá því á sunnudag þegar fréttist af væntanlegum vatnslokunum sem tóku gildi í gærkvöld.