Discovery á loft eftir viku

Geimferjunni Discovery verður í fyrsta lagi skotið á loft í næstu viku. Nú er liðin vika síðan hætt var við að skjóta henni á loft, þar sem skynjari í eldsneytistanki reyndist bilaður. Enn er verið að rannsaka orsakir bilunarinnar og hvers vegna hennar varð ekki fyrr vart. Sjö manna áhöfnin var komin um borð og aðeins tveir tímar í brottför þegar hætt var við. Átti þetta að verða fyrsta geimferðin síðan ferjan Kólumbía fórst árið 2003 þegar hún kom inn í lofthjúp jarðar. Ferð Discovery er heitið til Alþjóðlegu geimstöðvarinnar en gert er ráð fyrir að ferðin muni standa yfir í 12 daga.