Aðalmeðferð ákveðin í dag

Fyrirtaka í Baugsmálinu fer fram í Héraðsdómi Reykjavíkur í dag og verður þá væntanlega ákveðið hvenær aðalmeðferð verður í ákæruliðunum átta sem eftir standa í Baugsmálinu. Þetta er fyrsta fyrirtaka í málinu eftir að Hæstiréttur vísaði 32 ákæruliðum af 40 frá dómi í haust.

Gestur Jónsson, verjandi Jóns Ásgeirs Jóhannessonar, segir að í dag verði væntanlega tekin ákvörðun um framhaldið. Hann segist ekki vita hver tímaramminn sé.

Verjendur hinna sex ákærðu sakborninga vilji ljúka þessu eins fljótt og tæknilega sé hægt en hann viti ekki hvort ákæruvaldið hafi sömu afstöðu. "Okkur er ekki kunnugt um afstöðu ákæruvaldsins," segir hann.