Fiskifræði Hafró gengur ekki upp

"Þessar tillögur frá Hafrannsóknarstofnun sanna það enn einu sinni að starfsmenn hennar vita ekkert í þennan heim né annan þegar kemur að fiskveiðum," segir Ásgeir Guðbjartsson, fyrrverandi skipstjóri á Ísafirði, vegna tillagna Hafró fyrir næsta fiskveiðiár. Meta menn innan hennar það svo að skerða beri þorskkvóta um fjögur þúsund tonn þar sem æti fyrir þorskinn sé af skornum skammti meðan ekki finnst nein loðna. Á móti auka þeir heimildir í ýsu og ufsa en það er skammgóður vermir þar sem verð á mörkuðum fyrir þessar tegundir eru lág. Margir sjómenn sem Fréttablaðið hefur rætt við eru orðnir langþreyttir á hugmynda- og samstarfsleysi Hafrannsóknastofnunarinnar. Ásgeir segir víst að haldi sjór áfram að hlýna við landið eins og vísindamenn telja sé næsta víst að þorskurinn hverfi lengra norður í kaldari sjó en nú er. "Það er ekki mikill þorskur hér á miðum fyrir vestan og austan eins og sakir standa og það er fyrirséð að veiðar á þorski minnka mikið næstu ár hlýni sjórinn meira. Ég held eindregið að þessir blessuðu fiskifræðingar eigi að víkka sjóndeildarhring sinn og jafnvel taka mark á Jóni Kristjánssyni. Tuttugu ár er nægur tími til að sjá að þessi fiskifræði Hafrannsóknarstofnunar gengur alls ekki upp." Sigurður Sigurðsson, skipstjóri á Brettingi frá Vopnafirði, tekur alls hugar undir orð Ásgeirs. "Það er fleira undarlegt á seyði en hvarf loðnunnar. Hér fyrir austan finnst ekki grálúðan lengur og karfinn er ekki á sínum venjubundnu stöðum heldur. Hafró hefur engar kenningar eða hugmyndir um hvað þarna er á seyði og virðist ótrúlega oft úti á þekju í spám sínum og tillögum. Ráðgjöf þeirra fyrir næsta fiskveiðiár er út í hött og mér eru minnisstæð orð Jakobs Jakobssonar, fyrrum forstjóra Hafró, fyrir nokkrum árum þegar hann dásamaði fiskveiðistefnu Kanadamanna á sama tíma og hann fann veiðum í Barentshafi allt til foráttu. Þremur árum síðar fannst ekki hornsíli við Kanada en hvert metið af fætur öðru var slegið í Barentshafi. Þetta segir allt sem segja þarf um stofnunina."