Íslenski hesturinn sló í gegn

Íslenski hesturinn sló í gegn á stórsýningu og keppni sem nýverið fór fram í Bretlandi. Að sögn Jónasar R. Jónssonar, umboðsmanns íslenska hestsins, voru áhorfendur um 60 þúsund talsins og mun þetta hafa verið í fyrsta sinn sem Íslendingar taka þátt í þessum atburði. Hann segir standa til að fylgja kynningunni vel eftir ytra. Ellefu knapar sýndu tólf íslenska hesta á sjö sýningunum í höll sem tekur um 9.000 manns í sæti. Hestarnir komu víðs vegar að úr Evrópu. Jónas segir áhorfendur, sem vissu að hverju þeir gengu með öll önnur hestakyn, hafa hrifist mjög af íslenska hestinum.