Framsókn norður vill úr R-listanum

Gestur Gestsson, formaður Félags framsóknarmanna í Reykjavík norður, vill að Framsóknarflokkurinn bjóði sjálfur fram í næstu borgarstjórnarkosningum en ekki undir merkjum Reykjavíkurlistans. Gestur var kosningastjóri Framsóknarflokksins í síðustu alþingiskosningum og sat í kosningastjórn R-listans. Hann segist verða var við mikinn áhuga á þessu innan flokksins. "Ef við ætlum að vaxa, og framtíð flokksins mun ráðast hér í Reykjavík, þá hljótum við að þurfa að brjótast út úr Reykjavíkurlistanum. Það eru að alast upp kynslóðir í borginni sem þekkja ekkert annað en R-listann." Gestur segir flokkinn geta farið í samstarf um Reykjavíkurlista eftir næstu borgarstjórnarkosningar en hann þurfi að fara fram undir eigin merkjum í kosningunum sjálfum. "Mér finnst eins og menn séu að vakna af þyrnirósarsvefni í þessum málum. Við erum að ala Þórólf Árnason upp sem borgarstjóra án þess að vita hvaða flokki hann tilheyri. Á meðan eru okkar eigin borgarfulltrúar óþekktir." Alfreð Þorsteinsson, borgarfulltrúi Framsóknarflokksins innan Reykjavíkurlistans, segir að það hafi ávallt verið skiptar skoðanir um það innan Framsóknarflokksins, eins og annarra flokka sem standa að Reykjavíkurlistanum, hvort flokkarnir ættu að bjóða fram undir nafni flokkanna eða saman í R-listanum. Það sé því ekkert nýtt í ummælum Gests. Alfreð segir hins vegar alls ekki tímabært að taka ákvörðun um það og að hún verði væntanlega ekki tekin fyrr en seinni hluta næsta árs. Fyrir skömmu ritaði Guðlaugur Sverrisson, stjórnarmaður í Félagi framsóknarmanna í Reykjavík suður, á vefsíðu framsóknarfélaganna í borginni að hann tæki undir þá skoðun Halldórs Ásgrímssonar, formanns flokksins, að Framsóknarflokkurinn yrði sterkari við að bjóða fram B-lista í Reykjavík. Það myndi efla starfið innan hans og eins yrði flokkurinn sýnilegri borgarbúum.