Fíkniefni og vopn gerð upptæk

Lögreglan á Snæfellsnesi gerði töluvert af fíkniefnum og heilt vopnabúr upptækt á föstudagskvöld. Fíkniefnin og vopnin fundust á heimili karls og konu á fertugs- og fimmtugsaldri á Hellissandi. Lögreglan á snæfellsnesi stöðvaði fólkið á föstudagskvöld þar sem þau voru á leið vestur. Í framhaldi af því var farið fram á úrskurð dómara um leit í bílnum og þremur húsum í Snæfellsbæ. Í bílnum fundust tvö grömm af amfetamíni en i einu húsanna fundust um 85 grömm af maríjúana og var eitthvað af því í minni pakningum. Í húsinu fannst umtalsvert magn af vopnum, meðal annars tveir riflar, þrjar haglabyssur og sérlega öflug skammbyssa af tegundinni colt 45 sem er skeftishlaðinn og tekur mörg skot. Þá fundust svokallaðar heilkúlur í haglabyssur; það er að segja skot með í raun einu hagli. Slík skot eru bönnuð hér á landi en þeir sem til þekkja segja að þau geti farið í gegnum heila bifreið. Þá fundust skot af öllum tegundum og fjórir stórir hnífar. Fólkinu var sleppt að lokinni skýrslutöku en að sögn Ólafs Guðmundssonar, yfirlögregluþjóns, er enn verið að hnýta lausa enda í rannsókn málsins.