Banki stefnir Vélaborg

KB banki krefst opinberrar rannsóknar á viðskilnaði fyrri eigenda á fyrirtækinu Vélum og þjónustu hf. Helgi Sigurðsson, yfirlögfræðingur hjá KB banka, segir að óskað verði eftir opinberri rannsókn á ákveðnum þáttum í rekstri félagsins. Fyrrum eigendum Véla og þjónustu hf. hefur verið gert að skila nafninu sem þeir notuðu á nýju fyrirtæki sínu til rekstrarfélags KB banka. Bankinn rekur fyrirtækið áfram þrátt fyrir gjaldþrotið. Fyrri eigendur starfrækja sams konar fyrirtæki undir nafninu Vélaborg. Bæði fyrirtækin keppast um að ná umboðunum sem losnuðu við gjaldþrotið. Allir 39 starfsmenn Véla og þjónustu hf. fluttu með fyrri eigendum til Vélaborgar. Tveir hafa snúið til starfa hjá rekstrarfélagi gjaldþrotabúsins. Stefán Bjarnason, starfsmaður Vélaborgar og einn fyrrum eiganda Véla og þjónustu hf., segir KB banka reyna með öllum ráðum að stöðva rekstur nýja fyrirtækisins. "Bankinn þolir ekki að við, fyrri eigendur Véla og þjónustu, skyldum ekki hafa lagt upp laupana, hætt og hlaupið í felur þannig að hann gæti eignast það sem hann átti engan rétt til að eignast," segir Stefán. "Við erum óhræddir að takast á við þá fyrir dómstólum. Við teljum okkur ekki hafa gert neitt nema það sem við vorum neyddir til þar sem þeir fóru af stað með innheimtuaðgerðir á hendur gamla fyrirtækinu," segir Stefán. Þeir hafi skuldað bankanum um 65 til 70% krafnanna. Bankinn hafi ágirnst rekstur fyrirtækisins og ekki gefið þeim ráðrúm til endurfjármögnunar. Viðar Lúðvíksson, skiptastjóri Véla og þjónustu hf., segir fyrrum eigendur þrotabúsins hafa selt mikið af munum úr gamla fyrirtækinu til nýja fyrirtækisins sem þeir stofnuðu, rétt áður en það gamla varð gjaldþrota. "Þeir seldu meðal annars tölvur, tölvuþjóna, skrifstofumuni, verkfæri og verkfæralager," segir Viðar: "Þeir seldu einnig vörumerkið, nafnið, heimasíðuna og lénið; velar.is, gegn skuldajöfnuði." Viðar segir að kaupunum hafi verið rift. Fyrrum eigendur hafi skilað hluta munanna. Í skoðun sé hvort þeim beri að skila öðrum munum eða hvort þeim verði gert að borga mismuninn á verðmati þeirra og kaupverði.