Framalausar framsóknarkonur?

Varaþingmaður Framsóknarflokksins segir að þær konur sem aðallega hafi gagnrýnt formann flokksins að undanförnu séu þær sem hafi mistekist að komast til metorða í flokknum. Hann segir að Siv Friðleifsdóttir hafi einfaldlega ekki notið stuðnings þingflokksins og að það hafi ekkert með jafnréttismál að gera.  Varaþingmaður Halldórs Ásgrímssonar, Guðjón Ólafur Jónsson, fer mikinn í pistli á hrifla.is vegna óánægju framsóknarkvenna með þá ákvörðun formannsins að víkja Siv Friðleifsdóttur úr ríkisstjórn. Hann segir málið einfalt: Siv hafi einfaldlega ekki notið nægilegs trausts í þingflokknum og að það hafi ekkert með jafnréttismál að gera. Hann segir Halldór hafa rætt við alla þingmennina og í þeim viðtölum hafi komið fram að Siv nyti ekki meiri stuðnings en það að þingflokkurinn vildi alla vega fimm ráðherra frekar en hana.   Kristinn H. Gunnarsson, þingmaður Framsóknarflokksins, fær sinn skammt í pistlinum og segir Guðjón hann ekki vera í takt við Framsóknarflokkinn. Hann telur það segja sig sjálft. Guðjón segir að auglýsing framóknarkvenna í síðustu viku hafi endanlega gert vonir Sivjar um frekari ráðherradóm að þessu sinni að engu. Hann segir að með þessu hafi konurnar stillt Halldóri upp við vegg og hann ekki átt annarra kosta völ en að fara að vilja þingflokksins. Þá segir Guðjón að stuðningsmenn Sivjar og Jónínu Bjartmarz hafi hreytt ónotum í Árna Magnússon félagsmálaráðherra eftir að slagurinn hafi tapast. Þetta hafi komið fram í fjölmiðlum í síðustu viku. Guðjón segir að gagnrýnisraddirnar komi úr börkum kvenna sem einhvern tímann, einhvers staðar, hafi orðið fyrir vonbrigðum með eigin framgang í Framsóknarflokknum. Aðspurður um um hvaða konur sé að ræða segir hann að menn verði að ráða í það sjálfir og að þær konur taki þetta til sín sem eigi. Guðjón segir að lokum að formaður Framsóknarflokksins hafi mátt sæta árásum og hótunum af hálfu samflokksmanna sinna. Spurður hvort hann telji gagnrýni á formann flokksins vera árásir og hótanir segir Guðjón alla gagnrýni vera af hinu góða en hún verði líka að vera málefnaleg. Hann fullyrðir að lokum að allt sem standi í pistli sínum sé satt og rétt og enginn hafi getað hnikað því.