Lýðræðið fótum troðið

"Þessar niðurstöður eru svo sem ósköp eðlilegar því að ég fæ ekkert að koma málefnum framboðsins til skila," segir Ástþór Magnússon, sem mældist með 0,6 prósenta fylgi í skoðanakönnun Fréttablaðsins. Ástþór er harðorður í garð fjölmiðla, sem hann segir loka á umfjöllun um framboð hans. "Það er búið að traðka lýðræðið niður í svaðið," segir hann. "Forsetaframbjóðandi eins og ég fær ekki að koma skoðunum sínum á framfæri með málefnalegum hætti þannig að fólk geti gert upp hug sinn hvað er í boði í kosningum," segir Ástþór, sem var staddur í eltingaleik við forseta Íslands. "Ég er akandi á eftir honum á 150 kílómetra hraða á Keflavíkurveginum til að reyna að fá svar við þeirri spurningu hvort hann muni taka áskorun minni um að mæta mér í sjónvarpssal."