Hundruð bíða eftir meðferð

Fleiri hundruð manns bíða eftir meðferð vegna geðsjúkdóma og sumstaðar eru læknar hættir að taka fólk á biðlista, segir Ásta Ragnheiður Jóhannesdóttir Samfylkingunni. Heilbrigðisráðherra vísar því á bug að stór hópur þessa fólks sé á götunni. Þingmenn segja ástandið í þessum málum skömm fyrir þjóðfélagið og að nær væri að setja fjármuni í það heldur en að byggja „montbústað“ fyrir sendiherra landsins í Berlín. Ásta Ragnheiður ræddi stöðu geðsjúkra og þjónustu við þá utan dagskrár á Alþingi í dag. Áhugasamir um málið mættu á þingpalla til að fylgjast með. Hún sagði pott víða brotinn í þessum efnum og að stefnleysi ríkti og á sama tíma fjölgaði í þessum hópi. Hún sagði að algeng bið eftir tíma hjá geðlækni væri 3-5 mánuðir. 380 manns með geðrænan vanda bíða nú eftir meðferð á Reykjalundi að sögn Ástu Ragnheiðar. Biðin er rúmlega ár, og raunar lengri, því læknar eru hættir að setja fólk á biðlista. Hún sagði stöðu heimilislausra, mikið geðveikra einstaklinga á höfuðborgarsvæðinu vera afleita; þeir velkjist um í kerfinu án úrlausnar og séu hættulegir sér og öðrum. Heilbrigðisráðherra minnti á að aðstæður umrædds fólks væru mjög mismunandi og því ekki hægt að alhæfa. Hann sagði grundvöll þjónustunnar góðan og fór svo yfir aukin fjárframlög ríkisins til geðheilbrigðismála. Hann vísaði ennfremur á bug fullyrðingum um að hundruð manna ráfi um götur höfuðborgarinnar, án þess að fá viðeigandi meðferð. Ráðherra benti á að um áramót taki lokuð geðdeild, fyrir þá sem gætu verið hættulegir, til starfa á Kleppi. Guðmundur Árni Stefánsson sagði það til skammar hvernig búið er að geðfötluðum og Ögmundur Jónasson sagði að þessi mál ætti að ræða daglega á Alþingi þar til ástandið verður bætt. Ögmundur sagði að rúmum á geðdeildum væri nú fækkað til þess að ríkisstjórnin eigi fyrir gæluverkefnum sínum, t.d. að byggja „montbústað“ fyrir sendiherrann í Berlín fyrir 250 milljónir. Því mótmælti hann harðlega.