Íhuga að mæta ekki á mánudag

Lög voru sett á verkfall kennara í dag. Gerðardómur verður skipaður eftir viku takist deilendum ekki að semja fyrir þann tíma. Ríkisstjórnin kom til móts við óskir kennara og gerði breytingar á frumvarpinu. Forysta kennara segir það ekki nóg og að lögin séu ótæk. Stór hluti kennara íhugar enn að mæta ekki til vinnu á mánudaginn. Kennarar stóðu mótmælastöðu við Alþingi í morgun þegar umræðan um frumvarpið sem ætlað er að stöðva kennaraverkfallið hófst. Þeir púuðu hástöfum á stjórnarliða en fögnuðu stjórnarandstæðingum. Bjarni Benediktsson, formaður allsherjarnefndar, gerði í byrjun fundar grein fyrir breytingum á frumvarpinu. Hann rakti sjónarmið deilenda sem komu á fund nefndarinnar í gærkvöld og boðaði síðan breytingar á frumvarpinu. Hann sagði að lagt yrði til að stytta tímann sem deiluðailar fengju til þess að ná saman yrði styttur til 20. nóvember. Þá sagði Bjarni að ákvarðanir gerðardóms verði bindandi frá gildistöku laganna. Með þessu má segja að komið sé til móts við tvær af meginkröfum kennara, annars vegar að gerðardómur taki sem fyrst til starfa og hins vegar að úrskurður hans verði afturvirkur til þess dags sem kennurum er ætlað að mæta til starfa, það er á mánudaginn kemur. Frumvarpið var loks samþykkt með 28 atkvæðum gegn 21. Eiríkur Jónsson, formaður Kennarasambandsins, segir breytingarnar hafa verið spor í rétta átt en er þó ekki sáttur við lögin. Hann segist telja að lögin séu ónothæf og hann sjái ekki að nokkur árangur muni nást með þeim. Þarna vísar Eiríkur til ákvæðis í lögunum sem segir að Gerðardómurinn skuli hafa hliðsjón af almennri þróun á vinnumarkaði frá gerð síðasta kjarasamnings kennara. Stjórnarandstaðan tók einarða afstöðu gegn frumvarpinu. Bryndís Hlöðversdóttir sagði lagasetninguna einungis skjóta vandanum á frest, auk þess sem báðir deiluaðilar væru andsnúnir þessari lausn. Kolbrún Halldórsdóttir sagðist sannfærð um að aldrei ætti að skipa um kjör með lögum. Eiríkur segir að samninganefnd kennara hafi fundað þegar eftir að lögin voru sett. Hann segir að samþykkt hafi verið að bjóða upp á samninga við hvert sveitarfélag fyrir sig, þar sem launanefndin hefði nú misst réttinn á því að semja við alla. Eiríkur ítrekaði kröfu kennara fyrir allsherjarnefnd um að kennarar fengju eingreiðslu að afloknu verkfalli. Hann segist þó gera sér fullljóst að það sé ekki ríkisins að reiða eingreiðsluna af hendi. Hann segir að það ætti að vera hægt að benda sveitastjórnarmönnum á að það þyrfti að kaupa fólk úr verkfalli og sýna því strax að einhverjar breytingar hefðu orðið. Kennarar hafa fundað vítt og breitt um borg og bæ í dag og samkvæmt heimildum fréttastofu aukast líkur fremur en hitt á að fjölmargir kennarar mæti ekki til vinnu á mánudag.