Litlar líkur á árangri í bráð

Litlar sem engar líkur eru taldar á því að samningar takist í þessari fjórðu viku kennaraverkfallsins, sem nú er hafin. Ríkissáttasemjari sló viðræðunum ótímabundið á frest undir kvöld en ætlar að ræða við hvorn deiluaðilla fyrir sig á miðvikudag. Færi svo að þær viðræður skiluðu einhverju, er talið útilokað að ganga mætti frá samningum fyrir helgi. Nú hafa verið haldnir 62 formlegir fundir í deilunni frá áramótum og fjöldi óformlegra funda, en þrátt fyrir það ber enn mjög mikið í milli, að sögn deilenda. Kennarar hafa boðað til baráttufundar í Háskólabíói klukkan hálf fjögur í dag. Á sama tíma og þessu vindur fram er mikill uppgangur í skólastarfi við Kárahnjúka. Það gengur með eðlilegum hætti en grunnskólinn þar starfar samkvæmt námsskrá ítalska menntamálaráðuneytisins. Þar kenna tveir ítalskir kennarar 17 börnum og auk þess er búð að opna leikskóladeild, sem tíu börn sækja. Öll kennsla fer fram á ítölsku.