Sharon gefur líklega eftir

Aríel Sharon, forsætisráðherra Ísraels, ætlar líklega að gefa Gaza-svæðið eftir til Palestínumanna og þess í stað að efla landnemabyggðir á Vesturbakkanum. Ísraelski herinn hefur að hluta dregið sig frá norður Gaza-svæðinu og Sharon heldur fast í áætlanir um að leggja niður landnemabyggðir á svæðinu. Fréttir í gær sögðu hins vegar frá því að Ísraelsmenn hefðu áhuga á því að tengja stærstu landnemabyggðina á Vesturbakkanum við borgina Jerúsalem en Sharon neitar því. Landnemabyggðin á Vesturbakkanum sem um ræðir er stærsta landnemabyggð Ísraela á Vesturbakkanum og þar búa yfir þrjátíu þúsund manns. Sharon ætlar að fjölga íbúðum á svæðinu um sex hundruð en þær áætlanir eru allt að tíu ára gamlar. Það er því ljóst að Sharon ætlar ekki að gefa eftir þetta og önnur svæði á Vesturbakkanum. Nokkrir kílómetrar eru á milli byggðarinnar og Jerúsalems. Ljóst er að alþjóðasamfélagið myndi aldrei samþykkja slíka sameiningu. Ísraelsmenn hafa yfir að ráða fjörutíu prósentum af Vesturbakkanum sem ættu samkvæmt Oslóarsamkomulaginu að heyra undir Palestínu. Ísrael hertók Vesturbakkann árið 1967 og hefur smám saman verið að auka við landnemabyggðir sínar. Ísraelar hafa opnað landamæri Gaza-svæðisins og Egyptalands eftir mikinn þrýsting frá Evrópusambandinu og Sameinuðu þjóðunum. Yfir tvö þúsund Palestínumenn sátu fastir í Egyptalandi og höfðust í og við landamærastöð og þurfti egypski Rauði krossinn að dreifa matvælum á meðal fólksins. Ísraelar lokuðu landamærunum því þeir grunuðu að Palestínumenn væru að smygla vopnum frá Egyptalandi.