Birgir Leifur komst í gegn

Birgir Leifur Hafþórsson komst í gegnum niðurskurðinn fyrir fjórða og síðasta hringinn á öðru stigi úrtökumótanna fyrir evrópsku mótaröðina í golfi þrátt fyrir að hafa ekki náð sér á strik á þriðja hring. Birgir Leifur þurfti að hætta í miðjum klíðum á þriðja hring í gær vegna óveðurs en hann lauk við hann í morgun og lék á 76 höggum. Birgir Leifur var í 7.-10. sæti en féll niður í 20.-23. sæti á fjórum höggum undir pari. Lokahringurinn er þegar hafinn og verður Birgir Leifur að vera á meðal 29 efstu kylfinga til þess að tryggja sig inn á þriðja og síðasta stig úrtökumótanna. Þangað hefur Birgir Leifur áður komist og var aðeins einu höggi frá því að komast inn á Evróputúrinn fyrir nokkrum misserum.