Bobby grafinn upp eftir helgi

Stefnt er að því að grafa lík Bobbys Fisher upp í næstu viku samkvæmt heimildum Vísis. Ólafur Helgi Kjartansson sýslumaður sagðist, í samtali við Vísi, ekki geta staðfest það en hann býst við því að málin skýrist fljótlega eftir helgina.

Hæstiréttur Íslands ákvað í síðasta mánuði að líkamsleifar Fischers skyldu grafnar upp til þess að hægt verði að bera lífsýni úr honum saman við lífssýni úr filippseysku stúlkunni Jinky Young. Móðir Jinky, Marilyn Young, á í dómsmáli við börn og ekkju Fischers. Hún fullyrðir að Jinky sé dóttir Fischers og vill að faðerni hennar verði viðurkennt.

Bobby Fischer lést í byrjun árs 2008 og hvílir í Laugardælakirkjugarði sem er í umdæmi sýslumannsins á Selfossi.