Sunnlendingar mótmæla niðurskurði

Ögmundi Jónassyni, heilbrigðisráðherra, verður síðar í dag afhent um fjögur þúsund undirskriftir Sunnlendinga sem mótmæla fyrirhugaðri skerðingu á heilbrigðisþjónustu á Suðurlandi.

Fá umsamda launahækkun greidda

Fiskvinnslufyrirtækið Godthaab í Nöf í Vestmannaeyjum hefur ákveðið að borga starfsfólki sínu umsamda launahækkun sem búið var að semja um en ákveðið var að fresta fram á sumar með samkomulagi Samtaka atvinnulífsins og verkalýðshreyfingarinnar. Þetta kemur fram á fréttavefnum Eyjar.net. Um 80 starfsmenn starfa hjá Godthaab í Nöf.

Yfir 200 mál óafgreidd hjá ríkislögmanni

Meira en 200 mál voru óafgreidd hjá embætti ríkislögmanns í árslok 2008. Embættinu bárust 325 ný mál í fyrra. Fyrir voru 134 óafgreidd mál frá árinu áður. Í fyrra var lokið við 252 mál en 207 var ólokið í árslok. Þetta kemur fram í ársskýrslu embættisins.

Evrópusambandið ekki nefnt í drögum að landsfundarályktun

Endurreisnarnefnd Sjálfstæðisflokksins vill að Íslendingar gangi í Evrópusambandið. Hins vegar er ekki vikið einu orði að Evrópusambandinu í drögum að landsfundarályktun Sjálfstæðisflokksins um utanríkismál.

Erlendir fjárfestar halda að sér höndum

Fjöldi erlendra fjárfesta hefur áhuga á Íslandi, en skila sér ekki. Þeir halda að sér höndum og kvarta undan því að leikreglum sé breytt í miðju samningaferli. Ekki sé treystandi á óstöðugt starfsumhverfi hér á landi.

Hátæknisjúkrahús: Von á tillögum norskra sérfræðinga

Von er á tillögum norskra sérfræðinga um framtíð hátæknisjúkrahússins um næstu mánaðamót. Engin stefnubreyting er hjá stjórnvöldum um að reisa nýtt hátæknisjúkrahús við Hringbraut. Þetta staðfesti Ögmundur Jónasson, heilbrigðisráðherra á Alþingi fyrir helgi.

Spyrst fyrir um samgönguáætlun

Umræða utan dagskrár fer fram á Alþingi í dag um framgang samgönguáætlunar stjórnvalda. Málshefjandi er Ólöf Nordal, þingmaður Sjálfstæðisflokksins í Norðausturkjördæmi, og verður Kristján Möller, samgönguráðherra til andsvara.

Aukaársfundur ASÍ vegna ástandsins

Vegna Alþingiskosninganna eftir mánuð og ástandsins í þjóðfélaginu hefur verkalýðshreyfingin ákveðið að boða til aukaársfundar ASÍ og fer hann fram á Hilton hóteli á morgun.

Samfylkingin endurgreiðir styrk

Samfylkingin ætlar að endurgreiða síðar í dag 150 þúsund króna styrk sem flokkurinn fékk frá Íslandspósti árið 2007, segir Sigrún Jónsdóttir framkvæmdastjóri flokksins í samtali við fréttastofu. Hún segir að Samfylkingin harmi mistökin og að verklagsreglur við öflun styrkja til flokksins verði hertar.

Seðlabankastjóri þekkti ekki cad-hlutfall

Hannes Hólmsteinn Gissurarson prófessor og fyrrum stjórnarmaður í bankaráði Seðlabankans segir forsætisráðherra sennilega hafa brotið lög þegar hún réði norskan stjórnmálamann í embætti seðlabankastjóra. Þetta kemur fram í grein sem Hannes skrifar í Morgunblaðið í dag en þar segir hann einnig frá því að seðlabankastjórinn hafi ekki vitað hvað svokallað cad-hlutfall fjámálastofnana væri og sé bæði ákvörðunarfælinn og taugaóstyrkur.

Frestur til að komast á kjörskrá rennur út

Íslendingar sem skráðir hafa verið með lögheimili erlendis lengur en átta ár hafa frest til morguns til að komast á kjörskrá vegna þingkosninganna 25. apríl næstkomandi. Kjörskrá var áður miðuð við 1. desember ár hvert en ekki varð ljóst fyrr en 1. febrúar síðastliðinn að kosið yrði á þessu ári.

11 þúsund karlar atvinnulausir

Atvinnuleysi heldur áfram að aukast hröðum skrefum og nú eru 17.409 manns atvinnulausir á landinu öllu. Á vef Vinnumálstofnunnar kemur fram að atvinnulausir karlar eru 11.043 en konurnar eru 6.366 talsins. Á höfuðborgarsvæðinu eru 11.666 án atvinnu.

Skinney komin til Möltu

Fjölveiðiskipið Skinney, sem smíðað var á Tævan og er á heimleið til Hafnar í Hornafirði, kom í nótt til Möltu þar sem tekinn verður kostur og olía fyrir lokaáfanga heimferðarinnar.

Brim greiðir umsamda launahækkun

Sjávarútvegsfyrirtækið Brim í Reykjavík, sem rekur fiskvinnslu á Akureyri, í Grenivík, á Akranesi og að Laugum í Reykjadal, ætlar að greiða öllu landverkafólki sínu umsamda launahækkun upp á 13.500 krónur um mánaðamótin.

Tölvum stolið úr prentsmiðju

Brotist var inn í prentsmiðju við Skúlagötu í Reykjavík í nótt og þaðan stolið að minnsta kosti tveimur tölvum. Þjófurinn braut sér leið inn um aðaldyrnar með kúbeini og komst undan með þýfið. Hans er nú leitað. Ekki liggur fyrir hvort mikilvæg vinnugögn voru í tölvunum.

Bíll brann til kaldra kola

Mannlaus bíll brann til kaldra kola í Vatnsskarðsnámum ofan við Hafnarfjörð í gærkvöldi. Vegfarandi tilkynnti slökkviliði um brennandi bílinn um tíuleytið í gærkvöldi, en þegar það kom á vettvang logaði í rústum hans og er ekki vitað hvaða, eða hvernig, bíll þetta var.

Eftirlýstur piltur fundinn

Pilturinn, sem lögreglan á höfuðborgarsvæðinu lýsti eftir í gær, fannst í gærkvöldi, heill á húfi. Hans hafði verið saknað frá því á föstudag, er hann strauk frá meðferðarheimilinu Háholti í Skagafirði. Lögregla fann hann eftir ábendingu um dvalarstað hans.

Bíllinn seig undir þýfinu

Tveir Litháar voru handteknir á Suðurlandsvegi, austan við Selfoss undir morgun, á drekkhlöðnum bíl af þýfi. Þar voru meðal annars þrír flatskjáir sem enn báru skráningarnúmer lögreglu, eftir að lögregla lagði hald á þá í þýfi annarra þjófa fyrir þremur vikum.

Vill fá skaðabætur vegna leyfis sem hann var settur í

Séra Gunnar Björnsson, sem var sýknaður í Hæstarétti af ákærum um kynferðisbrot gegn tveimur sóknarbörnum sínum á unglingsaldri, vill fá greiddar skaðabætur vegna leyfis sem hann var settur í á meðan mál hans var til meðferðar hjá dómstólum. Gunnar mun aftur hefja störf í Selfosskirkju þann 1. maí.

Tveir sóttu um í Seljakirkju

Tveir umsækjendur eru um embætti prests í Seljaprestakalli, Reykjavíkurprófastsdæmi eystra. Frestur til að skila inn umsóknum rann út 17. mars. Embættið veitist frá 1. apríl næstkomandi.

Harmar að Sjálfstæðisflokkurinn hafi tekið við framlögum frá Neyðarlínunni

Andri Óttarsson, framkvæmdastjóri Sjálfstæðisflokksins, segist harma þau mistök sem urðu þegar að flokkurinn tók við fjárframlögum frá Neyðarlínunni. Í yfirlýsingu sem Andri hefur sent frá sér segir hann að framlagið hafi þegar verið endurgreitt og muni öll framlög sem stangist á við lög um fjármál stjórnmálasamtaka og frambjóðenda og um upplýsingaskyldu þeirra verða endurgreidd.

Lögreglan lýsir eftir Ingvari Erni Arnarssyni

Lögreglan á höfuðborgarsvæðinu lýsir eftir Ingvari Erni Arnarssyni sem strauk frá meðferðaheimilinu Háholti í Skagafirði síðastliðinn föstudag.

Bryndís vill sæti Ármanns

Bryndís Haraldsdóttir hefur farið fram á það við kjörnefnd Sjálfstæðisflokksins í Suðvesturkjördæmi að hún verði flutt upp í sjöunda sæti á lista Sjálfstæðisflokksins fyrir Alþingiskosningarnar í vor þar sem Ármann Kr. Ólafsson hefur ákveðið að taka ekki sæti á listanum. Að öðrum kosti hyggst hún ekki taka sæti á listanum.

Endurgreiði styrkinn frá Neyðarlínunni

Sigurður Kári Kristjánsson, þingmaður Sjálfstæðisflokksins, telur að Sjálfstæðisflokkurinn eigi að afþakka 300 þúsund króna framlag sem Neyðarlínan veitti flokknum árið 2007 og endurgreiða það.

Brjóstamjólk er besta næringin fyrir ungbörn

Landlæknisembættið, Lýðheilsustöð og Miðstöð heilsuverndar barna leggja mikla áherslu á að brjóstamjólk sé besta næring fyrir ungbörn enda er talið að kostir móðurmjólkur sem helsta næring barna á fyrsta ári vegi miklum mun þyngra en gallar.

Gamli tíminn enn í utanríkisráðuneytinu

Birkir Jón Jónsson, varaformaður Framsóknarflokksins, sagði á Alþingi í dag gamla tímann enn vera í gildi í utanríkisráðuneytinu og það væri undir ráðherra komið og hans hugarflugi hverjir væru ráðnir sem sendiherrar. Össur Skarphéðinsson, utanríkisráðherra, segist ekki hafa hugleitt hvort auglýsa eigi eftir sendiherrum.

Ásta geri grein fyrir alvarlegum ásökunum sínum

Ögmundur Jónasson heilbrigðisráðherra sagði á Alþingi fyrir stundu að hann færi fram á það að Ásta Möller þingmaður gerði grein fyrir alvarlegum ásökunum sínum gagnvart læknum í landinu. Ögmundur sagðist ætla að ræða ummæli Ástu um MS lyfið Tysabri á fundi heilbrigðisnefndar á miðvikudaginn.

Kosning um formann Samtaka atvinnulífsins hafin

Rafræn kosning formanns Samtaka atvinnulífsins er hafin meðal aðildarfyrirtækja samtakanna. Kosningin hófst í morgun en Þór Sigfússon, formaður SA, hefur ákveðið að gefa áfram kost á sér sem formaður. Þór er að ljúka sínu fyrsta starfsári sem formaður Samtaka atvinnulífsins en hann tók við formennsku á aðalfundi SA þann 18. apríl 2008.

Klínísk sjónarmið ráða því hverjir fá Tysabri lyfið

Björn Zoëga, framkvæmdastjóri lækninga á Landspítala, segir læknisfræðileg sjónarmið og niðurstöður rannsókna ráða því hvaða sjúklingar fái Tysabri meðferð á spítalnum. Ein aðalástæðan fyrir töf eru dauðsföll eftir gjöf lyfsins erlendis. Lyfið er nýtt og hefur hamlandi áhrif á MS sjúkdóminn.

Námsstefna fyrir atvinnulausa

Námsstefna verður haldin 3. apríl næstkomandi þar sem fjallað verður um tækifæri og úrræði fyrir einstaklinga sem hafa misst atvinnuna. Fjallað verður um breytingar á löggjöfinni og hvaða möguleikar felast í þeim. Námsstefnan er haldin á vegum nefndar félags- og tryggingamálaráðuneytis er vinnur að vinnumarkaðsúrræðum.

Opið í Bláfjöllum

Eftir vætutíð undanfarna daga er opið í Bláfjöllum í dag. Að sögn rekstrarstjóra svæðisins er fráært veður, sól og heiðskýrt og nóg af snjó. Í dag er opið í fjallinu til klukkan níu í kvöld.

Ríkið sjái um hjónavígslur

Ríkið á að sjá um hjónavígslur en trúfélög ákveði sjálf hvaða sambúðarform njóti blessunar hjá sér. Þetta er maðal þess sem segir í drögum að ályktunum um fjölskyldumál sem lögð verður fyrir landsfund Sjálfstæðisflokksins.

Fær átta milljónir vegna vélsleðaslyss

Eigandi vélsleða var dæmdur til þess að greiða stúlku rúmlega átta milljónir króna í bætur vegna slyss sem hún varð fyrir er hún ók vélsleðanum. Slysið átti sér stað árið 2002 við Hafravatn og féll hún af sleðanum og fékk þungt höfuðhögg. Eigandi vélsleðans er talin hafa borið ábyrgð á því að stúlkan sem þá var sautján ára gömul hafi ekki verið með hjálm.

Stjórnendurnir fóru í 60 ferðir til útlanda

Stjórnendur Sameinaða lífeyrissjóðsins fóru 60 sinnum til útlanda, þar af rúmlega 30 boðsferðir, og í sex laxveiðiferðir á vegum sjóðsins á tímabilinu 2003 til 2008. Þetta kemur fram í svari sjóðsins við fyrirspurn frá Félagi vélstjóra og málmtæknimanna.

Guðjón Arnar: Flokkurinn er ekki í góðu standi

,,Flokkurinn er náttúrulega ekki í góðu standi þegar koma svona uppákomur. Alls ekki. Þetta kemur manni algjörlega í opna skjöldu," segir Guðjón Arnar Kristjánsson, formaður Frjálslynda flokksins, um aðspurður um brotthvarf Ásgerðar Jónu Flosadóttur og tveggja þingmanna úr flokkknum.

Skartgripaþjófurinn handtekinn

Lögreglan á höfðuðborgarsvæðinu handtók í morgun mann, sem grunaður hefur verið um þjófnaði úr skartgripaverslunum undanfarna daga. Ábendingar bárust frá fólki strax eftir að fjölmiðlar birtu myndir af viðkomandi fyrir helgina. Þegar unnið var úr vísbendingunum beindist athyglin að tilteknum manni er kom heim og saman við fyrirliggjandi upplýsingar. Hann hefur viðkennt aðild að brotunum og gefið skýringu á tilefni þeirra. Maðurinn verður yfirheyrður nánar í dag.

Steingrímur skrifar undir Færeyjalánið í kvöld

Steingrímur J. Sigfússon, fjármálaráðherra, fer til Færjeyja í kvöld þar sem undirritaður verður samningur sem þjóðirnar hafa gert með sér um greiðslukjör lánsins sem Færeyingar buðu Íslendingum í kjölfar bankahrunsins.

Sigurjón stofnar nýtt fréttatímarit

Sigurjón M. Egilsson, blaðamaður, hefur ákveðið að stofna nýtt fréttatímarit sem verður alfarið óháð peningaöflum og stjórnmálum. Þegar eru komin loforð um hlutafé, að fram kemur á vefsíðu Sigurjóns.

Enn fækkar í Frjálslynda flokknum

Ásgerður Jóna Flosadóttir sem nýverið var kjörin varaformaður Frjálslynda flokksins hefur ákveðið að segja sig úr flokknum. Hún segir að Guðjón Arnar Kristjánsson, formaður flokksins, vilji ekki gera nauðsynlegar breytingar á flokknum. Ásgerður var kjörin varaformaður á landsþingi sem haldið var fyrir níu dögum.

Sjúkratryggingar endurgreiða 55 milljónir

Sjúkratryggingar Íslands að endurgreiða sjúkratryggðum einstaklingum kostnað vegna heilbrigðisþjónustu á seinasta ári í heildina 55 milljónir króna. Rúmlega 14.000 einstaklingar njóta góðs af, að fram kemur í tilynningu frá stofnunni. Upphæðirnar eru misháar en meðalgreiðsla á hvern einstakling er um 4.000 krónur.

Aðstoðarmannakerfi þingmanna verði lagt niður

Afnema ber aðstoðarmannakerfi þingmanna og efla nefndasvið Alþingis þess í stað. Þetta segir í drögum að ályktun sem liggur fyrir landsfundi Sjálfstæðisflokksins sem hefst með setningarræðu Geirs H. Haarde, fráfarandi formanns flokksins, á fimmtudaginn. Flokkurinn telur einnig brýnt að fækka ráðuneytum enda væri slík hagræðing gott fordæmi gagnvart öðrum stofnunum stjórnsýslunnar.

75 þúsund hafa þegar talið fram

Hátt í sjötíu og fimm þúsund skattframteljendur höfðu skilað inn skattaskýrslum sínum í morgun en í dag er síðasti dagurinn til að skila inn framtali. Hægt er að sækja um frest til að skila framtalinu og gildir hann fram í næstu viku. Að venju hafa margir framteljendur nýtt sér það.

Útvarpsstöð Ástþórs í loftið

Ástþór Magnússon og félagar í Lýðræðishreyfingunni hófu útsendingar Lýðvarpsins klukkan 07:00 í morgun. Í tilkynningu frá hreyfingunni segir að í hádeginu verði Fréttavaktin send út þar sem hlustað verður á fréttir ríkisútvarpsins með hlustendum.

Sigla til Ísafjarðar með veikan skipverja

Grænlenskur togari siglir nú fulla ferð áleiðis til Ísafjarðar með veikan sjómann sem þarf að komast undir læknishendur. Talið er að hann sé með botnlangakast og hafa skipstjórnendur verið í sambandi við þyrlulækni Landhelgisgæslunnar og notið aðstoðar hans.

Fjórhjólamenn handteknir eftir spjöll

Lögreglan á Suðurnesjum handtók í gærkvöldi tvo menn eftir að þeir höfðu spólað upp jarðvegi á friðlýstu svæði við Setberg, rétt sunnan við Sandgerði, og loks spólað hjólin föst.