Hafnar kröfum stjórnarandstöðunnar

Abhisit Vejjajiva, forsætisráðherra Tælands, segist harma dauða rúmlega 20 mótmælenda og lögreglumanna sem létu lífið í gær. Hann hafnar þó alfarið kröfum stjórnarandstöðunnar og segist ekki ætla að víkja sem forseti.

Íslenskur sérfræðingur: Rússanna bíður erfitt verk

Rannsóknarnefnd flugslysa í Rússlandi bíður erfitt og viðkvæmt verkefni segir íslenskur flugslysasérfræðingur. Vladimir Pútin ætlar persónulega að fylgjast með rannsókninni.

Nýir hópar leita eftir mataraðstoð

Nýir hópar leita nú í auknum mæli eftir matargjöfum. Forstöðumaður Samhjálpar segir að áður hafi samtökin aðallega gefið fólki í vímuefnaneyslu að borða, en nú séu öryrkjar og atvinnulausir fastir gestir hjá Samhjálp.

VG býður fram í 15 sveitarfélögum

Vinstrihreyfingin grænt framboð býður fram lista á mun fleiri stöðum í sveitarstjórnarkosningunum í vor en áður, eða í 15 sveitarfélögum. Forystumenn flokksins í sveitastjórnarmálum komu saman í Grindavík um helgina til að leggja línurnar fyrir átökin sem eru framundan.

Íslendingur uppfyllti ekki lengur skilyrði laga um búsetu hér á landi

Manni um fimmtugt brá í brún þegar Þjóðskrá tilkynnti honum að hann uppfyllti ekki lengur skilyrði laga um búsetu Íslandi. Þetta þykir manninum furðulegt enda er hann alíslenskur.

Skýrsla rannsóknarnefndar Alþingis kynnt á morgun

Skýrsla rannsóknarnefndar Alþingis um bankahrunið verður kynnt á á blaðamannafundi í fyrramálið.

Björgunarsveitarmenn á leið til baka - pikkuðu upp fólk á gangi

Björgunarsveitarmenn eru á leið til baka með tvo erlenda ferðamenn sem höfðu verið veðurtepptir í Baldvinsskála á Fimmvörðuhálsi í þrjá daga. Veður hefur verið afar slæmt á þessu svæði síðust daga.

Minntust látinna í Bangkok

21 maður féll og tæplega 900 særðust í átökum lögreglu og mótmælenda í Bangkok höfuðborg Tælands í gær. Þetta eru verstu pólitísku átök í landinu í 20 ár, en mótmælendur hafa staðið fyrir aðgerðum í mánuð. Þeir krefjast þess að þing landsins verði leyst upp, boðað til kosninga og að forsætisráðherrann fari úr landi.

Þyrlan lent með manninn

Þyrla Landhelgisgæslunnar lenti við Landspítalann í Fossvogi rétt fyrir klukkan fjögur með karlmann með mikla brjóstverki. Talið er að maðurinn sem er á sextugsalri hafi fengið hjartaáfall en það hefur ekki fengist staðfest.

Þyrla Gæslunnar kölluð út

Þyrla Landhelgisgæslunnar hefur verið kölluð út eftir að tilkynning barst á fjórða tímanum í dag um karlmann með mikla brjóstverki í Helgadal í Mosfellssveit. Undanfarar frá björgunarsveitum á höfuðborgarsvæðinu eru lagðar af stað á vettvang, samkvæmt Ólöfu Snæhólms Baldursdóttur hjá Slysavarnafélaginu Landsbjörg. Ekki fengust frekari upplýsingar um málið.

Ræða um stuðning ESB við atvinnu- og byggðaþróun

Gert er ráð fyrir að á annað hundrað manns muni sækja ráðstefnu um stuðning Evrópusambandsins við atvinnu- og byggðaþróun í aðildarríkjunum sem haldin verður í Salnum Kópavogi á fimmtudag og föstudag í næstu viku. Í tilkynningu frá utanríkisráðuneytinu segir að ráðuneytið ásamt Sambandi íslenskra sveitarfélaga og Framkvæmdastjórn Evrópusambandsins standi að ráðstefnunni.

Látlaus viðhöfn á flugvellinum í Varsjá

Lík Lech Kaczynski forseta Póllands var flutt með pólskri herflugvél til heimlandsins í dag. Látlaus viðhöfn var á flugvellinum í Varsjá, höfuðborg Póllands, þegar hermenn báru kistu forsetans út úr flugvélinni. Helstu ráðamenn landsins voru viðstaddir og hermenn stóðu heiðursvörð. Síðan var ekið með kistuna frá flugvellinum í gegnum miðborgina að forsetahöllinni.

Björgunarsveitarmenn ekki komnir í Baldvinsskála

Björgunarsveitarmenn eru ekki komnir að Baldvinsskála á Fimmvörðuhálsi en þar er erlent ferðafólk veðurteppt. Fólkið lagði af stað að gosinu í góðu veðri fyrir um þremur dögum, á leiðinni hreppti það mikið óveður og leitaði það skjóls í skálanum. Færðin er slæm og er því talið að það muni reynast þrautinni þyngri fyrir björgunarsveitarmenn að komast til þeirra, samkvæmt upplýsingum sem fengust hjá lögreglunni á Hvolsvelli.

Lítill órói við gosstöðvarnar

Lítill órói hefur verið gosstöðvarnar á Fimmvörðuhálsi síðastliðinn sólarhring og jarðskjálftar hafa verið afar fáir, samkvæmt upplýsingum sem fengust hjá Veðurstofunni.

Krefast rannsóknar á námuslysinu

Barack Obama, Bandaríkjaforseti, krefst þess að fram fari opinber rannsókn á orsökum kolanámuslyssins í Vestur-Virginíu fyrir tæpri viku þegar 29 starfsmenn létust í kjölfar sprengingar. Ekki er vitað hvað olli sprengingunni. Obama segir mikilvægt að fram fari ítarleg rannsókn svo að koma megi í veg fyrir samskonar slys í framtíðinni.

Árni Páll hótar lánafyrirtækjunum löggjöf

Árni Páll Árnason, félagsmálaráðherra, segir að ef ekki næst samkomulag við eignaleigufyrirtækin um hvernig leysa eigi skuldavanda þeirra sem tóku bílalán í erlendri mynt þá verði löggjöf beitt til að leysa vandann. Árni Páll sagði þetta í þættinum Sprengisandur á Bylgjunni í morgun.

Lúpínu eingöngu beitt á takmörkuðu svæði

Stöðva á útbreiðslu lúpínu og skógarkerfils, samkvæmt ákvörðun umhverfisráðherra. Forstjóri Náttúrufræðistofnunar og landgræðslustjóri kynntu umhverfisráðherra tillögur sínar fyrir helgi.

Skiltaþjófurinn framseldur til Póllands

Sænskur karlmaður, sem grunaður er um að hafa skipulagt þjófnaðinn á Arbeit macht frei skiltinu í Auscwitz var framseldur til Póllands í vikunni.

Minnast fórnarlambanna - Lík forsetans flutt til Póllands

Pólverjar minntust forseta síns og þeirra tuga manna sem fórust með honum í flugslysinu í Rússlandi í gær, með tveggja mínútna þögn í morgun. Kennsl hafa verið borin á lík forsetans sem líklega verður flutt til Póllands í dag.

Ögmundur: Almenningur búinn að fá upp í kok

„Er þetta leikrit eftir Ibsen? Nei, þetta er Ísland í dag,“ segir Ögmundur Jónasson, þingmaður VG. Hann segir hópmúgsefjun ríkja í þjóðfélaginu í tengslum við útkomu skýrslunnar. Þá segir að hann að almenningur sé búinn að fá upp í kok á réttarkerfi sem byggi á öfugsnúningi.

Öflugur jarðskjálfti við Salómonseyjar

Öflugur jarðskjálfti reið yfir skammt frá Salómonseyjum í Kyrrahafi í morgun. Skjálftinn var að stærðinni 7,1. Upptök hans voru tæplega hundrað kílómetra suðvestan af eyjunum. Hann var á 52 kílómetra dýpi. Ekki er búist við því að fljóðbylgja fylgi í kjölfarið.

Tuttugu látnir í Bangkok og meira en 800 særðir

Að minnsta kosti 20 eru látnir eftir átök mótmælenda við herinn í Tælandi og meira en 800 liggja slasaðir.

Föst í skála á Fimmvörðuhálsi

Erlent ferðafólk hefur verið veðurteppt í Baldvinsskála á Fimmvörðuhálsi í þrjá daga. Lögreglan á Hvolsvelli segir veður snælduvitlaust á svæðinu og varar fólk eindregið við því að vera á ferð.

Unnu til verðlauna í Blackpool

Dansararnir Höskuldur Þór Jónsson og Margrétar Hörn Jóhannsdóttir úr Dansíþróttafélagi Hafnarfjarðar vann fjögur silfurverðlaun í flokki 11 ára og yngri í danskeppni barna sem haldin var í Blackpool á Englandi í vikunni.

Trúleysingjar freista þess að fá páfa handtekinn

Tveir Bretar og þekktir trúleysingjar, Cristopher Hitchens og Richard Dawkins, ætla að freista þess að fá Benedikt 16. páfa handtekinn þegar hann kemur til Bretlands í haust. Þeir segja nægar forsendur fyrir handtökunni því Páfi hafi þaggað niður kynferðisbrot í kaþólsku kirkjunni og hylmt yfir með kynferðisbrotamönnum.

Vegir víðast hvar auðir

Það er hlýtt um allt land og vegir víðast hvar auðir. Ófært er bæði um Nesjavallaveg og Lyngdalsheiði vegna vatnavaxta. Þetta kemur fram í tilkynningu frá Vegagerðinni.

Sjö stútar stöðvaðir

Lögreglan á höfuðborgarsvæðinu stöðvaði í nótt sex ökumenn sem grunaðir voru um akstur undir áhrifum áfengis. Nóttin var að öðru leyti róleg hjá lögreglumönnum á höfuðborgarsvæðinu.

Pútín vakir yfir rannsókninni

Vladímir Pútín, forsætisráðherra Rússlands, hefur lýst því yfir að hann muni persónulega fylgjast með rannsókn á flugslysinu þegar forseti Póllands og fylgdarlið hans fórst í flugslysi í vesturhluta Rússlands í gær. Flest bendir til að mistök flugmanna hafi orsakað slysið þegar Lech Kaczynski, forseti Póllands, eiginkona hans og tugir æðstu embættismanna landsins fórust við Smolensk í Rússlandi í gærmorgun.

Lög um reykingabann á opinberum stöðum samþykkt í Paragvæ

Íbúum Paragvæ er ekki lengur heimilt að kveikja sér í sígarettum á veitingastöðum, knæpum og verslunarmiðstöðum. Þingmenn samþykktu frumvarp þess efnis fyrir helgi.

Fjögur lík fundust til viðbótar

Lík fjögurra manna fundust í gærkvöldi í kolanámu í Vestur-Virginíu. Þeirra hafði verið saknað frá því í byrjun vikunnar en eiturgufur torvelduðu björgunarstörfin. Lík 25 manna höfðu áður fundist.

Borgarholtsskóli vann Söngkeppni framhaldsskólanna

Borgarholtsskóli bar sigur úr býtum í Söngkeppni framhaldsskólanna sem fór fram á Akureyri í kvöld og var sýnd í beinni útsendingu hér á Vísi og á Stöð 2. Það voru félagarnir Kristmundur Axel og Júlí Heiðar sem sungu til sigurs með íslenskri rappaðri útgáfu af lagi Erics Clapton Tears in Heaven.

Blóðug átök í Bangkok

Að minnsta kosti ellefu féllu og yfir 500 særðust í hörðum átökum í Bangkok, höfuðborg Tælands, í dag. Undanfarnar vikur hafa stjórnarandstæðingar krafist þess að ríkisstjórnin fari frá völdum og að boðað verði til kosninga svo að milljarðamæringurinn Thaksin Shinawatra sem var steypt af stóli sem forsætisráðherra fyrir fjórum árum geti tekið aftur við völdum í landinu. Fyrr í vikunni lýsti forsætisráðherrann Abhisit Vejjajiva yfir neyðarástandi í höfuðborginni. Átökin í dag voru þau blóðugustu til þessa.

Hundruð milljóna horfnar

Hundruð milljóna króna hafa horfið út af reikningum Baldurs Guðnasonar, fyrrverandi forstjóra Eimskips, á síðustu misserum. Búið er að krefjast kyrrsetningar á eigum hans og Steingríms Péturssonar, viðskiptafélaga hans, en báðir sæta þeir skattrannsókn.

Varað við hvassviðri á Ólafsfjarðarvegi

Lögreglan á Dalvík vill vara vegfarendur sem eiga leið um Ólafsfjarðarveg við miklu hvassviðri, suðvestan strekkingur þvert á veginn. Þakplötur eru að fjúka af útihúsum og eins eru ökumenn með kerrur sérstaklega varaðir við að vera þar á ferðinni.

Einn með allar tölurnar réttar - fær 28 milljónir

Einn var með allar tölurnar í Lottóinu réttar í kvöld og hlýtur vinningshafinn 28.367.070 krónur. Vinningsmiðinn var keyptur í Hagkaup á Akureyri. Sjö voru með fjórar tölur réttar auk bónustölunnar og fá eigendur miðanna rúmlega 111 þúsund krónur í sinn hlut.

Össur um forseta Póllands: Hlýja hans gagnvart Íslandi var ótvíræð

„Þetta er ógurlega sorglegt og ég fyllist samúð með pólsku þjóðinni að missa forseta sinn með þessu hætti,“ segir Össur Skarphéðinsson, utanríkisráðherra, um Lech Kaczynski, forseta Póllands, sem fórst í flugslysi í vesturhluta Rússlands í morgun. Talið er að 96 manns hafi farist í slysinu, þar á meðal forsetafrúin, fjölmargir háttsettir embættismenn og æðstu ráðamenn pólska hersins.

Biskup kaþólikka sendir samúðarkveðjur

Pétur Bürcher, biskup kaþólikka hér á landi, sendir pólsku þjóðinni og Pólverjum á Íslandi samúðarkveðjur sínar flugslyssins í Rússlandi í morgun. Þar fórust forseti Póllands, forsetafrú, hópur þingmanna og margir af æðstu embættismönnum pólska hersins. Hann var ekki viðstaddur minningarathöfnina í Kristskirkju í dag en hann er á ferðalagi um Austurland vegna ferminga.

Eitt af stórvirkjum Brams flutt á tónleikum í Hallgrímskirkju

Um 120 manns taka þátt í flutningi á meistaraverki Brahms, Ein Deutsches Reguiem eða þýskri Sálumessu á lokatónleikum Kirkjulistahátíðar nú um helgina. Stjórnandinn segist hafa beðið eftir því að fá flytja það í 30 ár enda telji hann það eitt fegursta verk sem samið hefur verið.

Kynna og kanna undraheima vísindanna

Ísprinsessa, vatnshrútur og eldorgel er á meðal þess sem börn á öllum aldri geta kynnt sér í Norræna húsinu næstu vikur, en Tilraunalandið opnaði þar í gær. Það er sýning sem hefur það að markmiði að kynna og kanna undraheima vísindanna.

Fullt út úr dyrum í minningarathöfn

Minningarathöfn í Kristskirkju á Landakoti um forsetann og alla þá sem fórust í flugslysinu í Rússlandi í morgun er nýlokið. Í slysinu fórust forseti landsins og fjölmargir háttsettir embættismenn. Fullt vart út úr dyrum í Kristskirkju en meðal þeirra sem sóttu athöfnina voru Jóhanna Sigurðardóttir, forsætisráðherra, og Ásta Ragnheiður Jóhannesdóttir, forseti Alþingis.

Fyrirskipar viku þjóðarsorg í Póllandi

Forseti pólska þingsins hefur tekið við embætti forseta landsins til bráðabirgða eins og stjórnarskrá Póllands gerir ráð fyrir. Hann hefur fyrirskipað viku þjóðarsorg í landinu vegna flugslyssins skammt frá Smolensk í vesturhluta Rússlands, þar sem Lech Kaczynski forseti landsins og margir æðstu embættismenn landsins fórust.

Söngkeppni framhaldsskólanna í beinni á Vísi

Söngkeppni framhaldsskólanna sem fer fram í íþróttahöllinni á Akureyri í kvöld verður sýnd í beinni útsendingu á Vísi. Einnig verður sýnt frá keppninni í opinni dagskrá Stöðvar 2. Í þessari vinsælustu og fjölmennustu söngvarakeppni landsins mæta til keppni allir framhaldsskólar landsins og er þetta í 20. sinn sem keppnin er haldin.

Hannes Hlífar Íslandsmeistari í skák í ellefta skipti

Hannes Hlífar Stefánsson sigraði Guðmund Gíslason í elleftu og síðustu umferð Íslandsmótsins í skák í dag. Hannes hefur því tryggt sér sigur á mótinu og það í ellefta sinn á 13 árum en Hannes tók ekki þátt í mótinu árin 2000 og 2009 og hefur ávallt sigrað á Íslandsmótinu síðan 1998 hafi hann á annað borð tekið þátt í mótinu. Þetta kemur fram í tilkynningu frá Skáksambandi Íslands. Hannes hlaut 8,5 vinning í 10 skákum.

Komin fram

Konan sem lögreglan á höfuðborgarsvæðinu lýsti eftir fyrr í dag er komin fram. Hún fór frá Landsspítalanum í gærdag og er síðast vitað um ferðir hennar við Hlemm eftir miðnætti í nótt.

Jóhanna sendi samúðarkveðjur

Jóhanna Sigurðardóttir, forsætisráðherra, sendi í dag forsætisráðherra Póllands, Donald Tusk, samúðarkveðju. Í bréfi til ráðherrans lýsir hún yfir dýpstu samúð ríkisstjórnarinnar og íslensku þjóðarinnar vegna hins hörmulega flugslyss í morgun þar sem forseti Póllands, eiginkona hans og fylgdarlið létust.