Össur um forseta Póllands: Hlýja hans gagnvart Íslandi var ótvíræð

„Þetta er ógurlega sorglegt og ég fyllist samúð með pólsku þjóðinni að missa forseta sinn með þessu hætti," segir Össur Skarphéðinsson, utanríkisráðherra, um Lech Kaczynski, forseta Póllands, sem fórst í flugslysi í vesturhluta Rússlands í morgun. Talið er að 96 manns hafi farist í slysinu, þar á meðal forsetafrúin, fjölmargir háttsettir embættismenn og æðstu ráðamenn pólska hersins.

„Ég hitti forsetann nokkrum sinnum og átti tvisvar með honum fundi. Í fyrra skiptið í tengslum við leiðtogafund Atlantshafsbandalagsins í Strassborg. Síðan átti ég með honum fund ásamt forseta Íslands í höfuðstöðvum Sameinuðu þjóðanna í september síðastliðnum," segir Össur.



Hafði samúð með Íslendingum

Utanríkisráðherra segir að Kaczynski hafi að mörgu leyti verið umdeildur maður en hlýja hans gagnvart Íslandi hafi verið ótvíræð. Forsetinn hafi haft mikinn áhuga á íslensku þjóðinni og þekkti málefni hennar vel.

„Í september ræddi ég einkum við hann um erfiðu deilumálin, samstarfið við AGS og Icesave. Hann hafði mjög mikla samúð og skilning með okkar stöðu. Það var alveg ótvírætt af hálfu Pólverja að þeir studdu okkur og tengdu stuðninginn með engum hætti við lánveitingar í tengslum við efnahagsáætlun Alþjóðagjaldeyrissjóðsins eða Icesave deiluna," segir Össur.

Á leiðtogafundinum í Strassborg í apríl á síðasta ári segist Össur hafa náð að þakka Kaczynski drenglyndi Pólverja eftir bankahrunið þegar Pólverjar buðu Íslendingum lán upp á tæplega 200 milljónir bandaríkjadala.

„Þeir gerðu það ekki með neinum lúðrablæstri og söng. Þeir létu nægja að segja Svíum, sem höfðu þá forystu um lánið til okkar, að þeir vildu vera hluti af Norðurlandahópnum. Við í ríkisstjórninni heyrðum fyrst af þessu í erlendum fréttum þannig að þeir voru ekki slá sér upp á því," segir Össur.

Fróður um Ísland og stöðu Pólverja hér á landi

Össur segir að það hafi glatt Kaczynski að heyra af því hversu vel Pólverjum hafi verið tekið á Íslandi.

„Það var alveg ljóst að bæði skiptinn sem ég átti við hann lengri samtöl að hann var mjög þakklátur fyrir það hvað hversu opnum örmum Íslendingar hefðu tekið pólska samfélaginu á Íslandi. Hann vissi mikið um stöðu ísland og stöðu Pólverja hér á landi. Hann vissi til að mynda að Pólverjar væru stærstu þjóðarbrotið og að sambúðin hefði gengið mjög vel. Hann var mjög glaður þegar ég sagði honum hve mikilvægir þeir hefðu verið í okkar samfélagi. Þannig að það er ljóst að Kaczynski var af einn af þeim sem vildu styðja okkur," segir Össur.