Minntust látinna í Bangkok

21 maður féll og tæplega 900 særðust í átökum lögreglu og mótmælenda í Bangkok höfuðborg Tælands í gær. Þetta eru verstu pólitísku átök í landinu í 20 ár, en mótmælendur hafa staðið fyrir aðgerðum í mánuð. Þeir krefjast þess að þing landsins verði leyst upp, boðað til kosninga og að forsætisráðherrann fari úr landi.

Minningarathöfn var haldinn í höfuðborginni í dag um þá mótmælendur sem létust í átökunum. Að minnsta kosti fjórir af þeim sem létust eru lögreglumenn.

Skothylki, blóðpollar og skemmd farartæki frá hernum eru á víð og dreif um fjölfarnar ferðamannagötur í miðborg Bangkok. Fjöldi ríkja hefur varað þegna sína við því að ferðast til Tælands, en ferðaþjónusta er ein mikilvægasta atvinnugrein landsins.

Heldur rólegra er í borginni í dag en mótmælendur hafast við í lokuðum búðum og neita að ræða samkomulag við stjórnvöld. Þar hafa þeir safnað saman vopnum sem þeir hafa tekið af hermönnum í átökum við þá.