Tjaldanes til sölu

Tjaldanes, heimili þroskaheftra drengja í Mosfellsdal, er til sölu, Starfsemi lagðist þar af í maí síðastliðnum, en frá því á síðasta ári hefur verið unnið að því að koma heimilismönnum fyrir annars staðar. Þeir búa ýmist einir eða fleiri í þjónustuíbúðum víðs vegar í Mosfellsbæ, þar sem veitt er þjónusta allan sólarhringinn.

Enn strandaglópar í Björgvin

Fjöldi Íslendinga eru enn strandaglópar á flugvellinum í Björgvin í Noregi vegna verkfalls flugumferðarstjóra í Osló. Vél Icelandair sem var á leið til Osló var á síðustu stundu snúið til Björgvin, en rúmlega hundrað farþegar voru um borð.

Starfsmanni CNN rænt

Vopnaðir menn rændu í dag starfsmann CNN fréttastofunnar á Gaza-svæðinu, samkvæmt fréttum arabísku sjónvarpsstöðvarinnar AL-Jazeera. Maðurinn sem var rænt er arabískur Ísraeli og hefur unnið sem aðstoðarupptökustjóri fyrir CNN á Gaza-svæðinu.

Udo rannsakaður

Saksóknari í Þýskalandi hefur hafið rannsókn á Udo Voigt leiðtoga þjóðernissinnaða lýðræðisflokksins, NPD, eftir að hann bar lof á Adolf Hitler og kallaði hann stjórnvitring. Hann lét þessi ummæli falla í viðtali við vikublaðið Junge Freiheit. Að sögn talsmanns saksóknarans í Berlín sætir Voigt rannsókn fyrir niðrandi ummæli.

Ætla að fjölga sumarbústöðum

Tillaga að nýju aðalskipulagi Þingvallasveitar gerir ráð fyrir að landeigendum verði heimil stórfelld uppbygging sumarhúsabyggða, bæði með þéttingu núverandi svæða og nýjum sumarbústöðum.

Þurfa 27,7 milljarða á næsta ári

Stjórnendur Landspítalans telja sig þurfa 27,7 milljarða króna á næsta ári til að geta haldið rekstri spítalans óbreyttum frá því sem verið hefur. Formaður stjórnarnefndar spítalans er bjartsýnn á að spítalinn þurfi ekki að standa við 700 milljóna króna niðurskurð í haust.

Blóðtaka hjá al-Qaeda

Einn æðsti leiðtogi al-Qaida samtakanna féll í tveggja klukkustunda skotbardaga í Pakistan í gær. Stjórnvöld þar segjast vera á hælunum á leiðtoga samtakanna.

Enn hækkar olían

Aldrei í sögu olíumarkaðarins í New York hefur verð á olíu verið jafn hátt, og sérfræðingar segja vonlítið að það lækki á næstunni. Verðið á olíufatinu komst í 49 dollara og 74 sent á olíumarkaði í New York og hefur aldrei verið hærra frá því að viðskipti hófust á þeim markaði árið 1983.

Hættulegir hlutir finnast

Nokkrar vélbyssur og fleiri hættulegir hlutir fundust fyrir helgi við flak breskrar sprengjuflugvélar á Eyjafjallajökli. Vélin fórst í seinna stríði fyrir réttum sextíu árum.

Enn óvíst með framsal

Ekki er enn vitað hvort orðið verður við framsalsbeiðni íslenskra stjórnvalda vegna rannsóknar á einu umfangsmesta fíkniefnamáli síðari ára. Þrjár stórar sendingar fíkniefna komu frá Hollandi, tvær með Dettifossi og ein í pósti.

Játuðu brottkast

Skipstjóri og útgerðarmaður í Ólafsvík gengust undir það í Héraðsdómi Vesturlands að greiða hvor eina milljón króna í sekt fyrir brottkast. Verði sektin ekki greidd innan fjögurra vikna kemur þriggja mánaða fangelsi í stað sektarinnar.

Ákærður fyrir umboðssvik

Fyrrverandi framkvæmdastjóri og stjórnarformaður Lykilhótela hefur verið ákærður af Ríkislögreglustjóra fyrir umboðssvik þegar hann tók 37 milljóna króna lán í nafni félagsins hjá Framkvæmdasjóði Íslands.

Óbætanlegt tjón

Listaverk eftir Ríkharð Jónsson urðu meðal annars fyrir barðinu á skemmdarvargi, sem svalaði skemmdarfýsn sinni í Byggðasafni Austur Skaftfellinga um helgina, þar sem óbætanlegt tjón var unnið.

Skuggi Íraks vofir yfir

Landsþing breska Verkamannaflokksins stendur nú sem hæst. Leiðtogar flokksins reyna hvað þeir geta til að beina athyglinni að árangri sínum heima fyrir en þingfulltrúar vilja heldur ræða um ástandið í Írak.

Hálfíslenskur Hallgrímur

Danir eru flestum þjóðum fimari í að framleiða áhugavert sjónvarpsefni. Nýjasta afurð frænda vorra er spennuþáttaröð þar sem hálfíslenskur lögregluþjónn er aðalsöguhetjan.

Harmleiks minnst

Eistlendingar, Finnar og Svíar minnast þess í dag að tíu ár eru liðin frá því farþegaferjan Estonia sökk á Eystrasalti með 852 farþega og áhafnarmeðlimi innanborðs. Einungis 138 einstaklingar lifðu slysið af.

Samfylking vill úttekt

Margrét Frímannsdóttir þingflokksformaður Samfylkingarinnar telur furðu sæta að ríkisfyrirtækið Síminn kaupi hlut í fjölmiðlafyrirtæki þegar talað sé um nauðsynlegan niðurskurð hjá Ríkisútvarpinu. Þingflokkurinn hefur farið fram á að gerð verði opinber úttekt á Landssímanum og dótturfélögum hans.

N-Kóreustjórn skammar Bandaríkin

Bandaríkin hafa hert á hótunum sínum og eyðilagt möguleikana á friðsamlegri lausn kjarnorkudeilunnar á Kóreuskaga, sagði Choe Su Hon, varautanríkisráðherra Norður-Kóreu á ráðherrafundi allsherjarþings Sameinuðu þjóðanna.

Efast enn um kosningakerfið

Jimmy Carter, fyrrum Bandaríkjaforseti, segir langt í land áður en hægt verður að tryggja heiðarlegar kosningar í Flórída þar sem öruggt er að úrslitin verði í samræmi við vilja kjósenda.

Skákin heldur áfram

Þingmenn Framsóknarflokksins hittast á morgun og skipta með sér nefndarstörfum fyrir komandi vetur. Siv Friðleifsdóttir bætist í hóp óbreyttra og er hart deilt um hver eigi að víkja úr hvaða embætti fyrir hana.

Þrjú myrt á sólarhring

Níu mánaða barn, átján ára stúlka og 41 árs karlmaður voru myrt í Noregi um helgina. Þrír karlmenn hafa verið handteknir vegna rannsóknar málanna þriggja og tengjast þeir allir, með einum eða öðrum hætti, þeim sem þeir eru grunaðir um að hafa myrt.

Setja hömlur á SMS-leiki

Kínversk stjórnvöld hafa bannað sjónvarpsstöðum að efna til leikja þar sem fólk sendir svör inn í smáskilaboðum úr farsímum nema að fengnu sérstöku leyfi. Ákvörðunin er að sögn tekin eftir að ein sjónvarpsstöð efndi til leiks sem fól í sér að fólk átti að svara því hversu margir hefðu látið lífið í gíslatökunni í Beslan í Rússlandi.

Engin lausn í sjónmáli

Engin lausn er í sjónmáli í kennaradeilunni. Deilendur reikna ekki með því að leggja fram sáttatilboð á fimmtudag og ríkissáttasemjari segir engar forsendur fyrir sáttatillögu. Staðan er því hin sama og þegar síðasti fundur var haldinn á fimmtudaginn.

Ný stólalyfta í Bláfjöllum

Verið er að reisa nýja 250 milljóna króna skíðalyftu í Bláfjöllum, þrátt fyrir mesta snjóleysi í manna minnum á skíðasvæðum höfuðborgarsvæðisins undanfarna vetur. En lyftan verður einnig notuð á sumrin, til að flytja ferðamenn og reiðhjólin þeirra upp á fjallstindana.

Guðni vill ekki lög

Menn eiga ekkert að vera gefa undir fótinn með það að ríkisvaldið grípi inn í kjaradeilu kennara við sveitarfélögin segir Guðni Ágústsson starfandi forsætisráðherra.

Unnt að endurvekja eggjastokka

Konur sem greinast með krabbamein ættu að láta taka vefsýni úr eggjastokkunum og frysta. Þetta er mat íslensks sérfræðings, sem telur að innan fárra ára verði unnt að gera eggjastokka sem skaddast hafa við krabbameinsmeðferð, virka aftur.

Gallaðir sæðingarhrútar

Tveir hrútar, sem nefnast Vinur og Kunningi, verða aflífaðir í haust, þar sem vanskapnaður erfist frá þeim. Báðir hrútarnir hafa verið notaðir á sæðingarstöðvum og eiga því gríðarlegan fjölda afkvæma. Vansköpuð lömb í íslenska sauðfjárstofninum hafa ekki verið algeng í samanburði við mörg erlend sauðfjárkyn.

Dæmdi dagpabbinn vill börnin

Sigurður Guðmundsson, sem losnaði úr fangelsi í sumar eftir að hafa verið dæmdur fyrir að hrista barn til dauða, stefnir í forræðisdeilu vegna barna sem sett voru í fóstur án samráðs við hann. Átta erlendir réttarmeinafræðingar töldu Sigurð saklausan. Fimm ára bið er í að hann komist fyrir mannréttindadómstólinn í Strassbourg.

Vilja fund með sveitarstjórum

Kennarar óskuðu í gær eftir fundi á morgun með sveitarstjórum nokkurra stærstu sveitarfélaga landsins til að ræða stöðuna í verkfallinu og skýra sjónarmið sín. Eiríkur Jónsson, formaður Kennarasambands Íslands, sagði að margir sveitarstjórar hefðu synjað beiðni kennara í gær og ætli ekki að mæta til fundarins. Hins vegar hefði enginn boðað komu sína.

Samfylking vill rannsókn á Símanum

Þingflokkur Samfylkingarinnar hefur farið fram á það við forsætisnefnd Alþingis að ríkisendurskoðun rannsaki fjárfestingar Símans á undanförnum árum og nýleg kaup hans á hlut í Skjá einum. Þingflokkurinn vill fá skýringar á því hvers vegna Síminn ákvað að blanda sér í fjölmiðlarekstur þar sem engin eðlileg útskýring hafi verið gefin fyrir þeirri ákvörðun.

Íþróttir kunna að verða undir

Eggert Magnússyni, formanni Knattspyrnusambands Íslands, finnst ástæðulaust að sameina íþróttamál og menningarmál í stjórnkerfi Reykjavíkurborgar. Tillögur um það eru til umfjöllunar hjá borgarfulltrúum Reykjavíkurlistans.

Þúsund ára ísjaki stal senunni

Viðamikil íslensk menningar- og vísindakynning hófst í París í gær með því að 14 tonna íslenskum ísjaka var komið fyrir við vísindasafnið nærri Champs Elysée. Flutningur jakans hefur vakið gríðarlega athygli í Frakklandi. </font /></b />

Frakkar nýti sér íslenskan hagvöxt

Halldór Ásgrímsson forsætisráðherra hitti Jean-Pierre Raffarin, forsætisráðherra Frakklands, að máli í Hotel Matignon, embættisbústað þess síðarnefnda í París í gær. Þetta var fyrsti fundur Halldórs með erlendum starfsbróður frá því að hann tók við embætti forsætisráðherra um miðjan þennan mánuð.

Rússland er orðið amerísk nýlenda

Nafn Boris Spassky, fyrrverandi heimsmeistara, verður trúlega alltaf tengt Bobby Fischer og einvígi aldarinnar í Reykjavik. Spassky hefur verið búsettur í Frakklandi undanfarna áratugi og er franskur ríkisborgari, kvæntur franskri konu.

Ekkert lát á straumi fíkniefna

Mörg stór fíkniefnamál hafa komið upp síðustu ár. Tólf ára fangelsisdómur yfir Austurríkismanni var mildaður í níu ár í Hæstarétti. Tryggvi Rúnar Guðjónsson situr nú af sér tíu ára fangelsisdóm sem er þyngsti fíkniefnadómur Hæstaréttar. </font /></b />

Kviknaði í eldavél

Slökkvilið höfuðborgarsvæðisins var kallað að sambýlinu við Reykjadal í Mosfellsdal laust eftir klukkan sjö í morgun. Þar hafði kviknað í við eldavélina í húsinu. Greiðlega gekk að slökkva eldinn og urðu skemmdir vegna brunans óverulegar.

Leiðtogi Hamas myrtur

Einn af leiðtogum palestínska öfgahópsins Hamas var myrtur í Damaskus, höfuðborg Sýrlands, í morgun. Maðurinn sem var myrtur, Izz el-Deen al-Sheikh Khalil að nafni, hefur verið útlagi frá Ísrael í tólf ár en forsvarsmenn Hamas segja að leyniþjónusta Ísraels, Mossad, hafi myrt hann.

Þrefaldur pottur næst

Enginn vann tvöfalda pottinn í lottóinu í gær. Tölurnar sem upp komu voru 7 - 11 - 16 - 22 og 25 og bónustalan var 25. Rúmlega 6,6 milljónir voru í pottinum tvöfalda. Hann verður því þrefaldur um næstu helgi og fer því væntanlega yfir 10 milljónir.

Jeanne kominn til Flórída

Fellibylurinn Jeanne gekk á land á austurströnd Flórída snemma í morgun og hefur þegar valdið töluverðu tjóni. Rafmagnslínur, sem sumar eru nýviðgerðar eftir aðra fellibyli undanfarnar vikur, hafa nú enn og aftur farið í sundur og þök, og reyndar allt lauslegt, fýkur um svæðið.

Brennisteinsfnykur í Eyjum

Nokkrir jarðskjálftar hafa orðið út af Eldeyjarboða á Reykjaneshrygg í gærkvöldi og í nótt. Sá snarpasti mældist 3,3 stig á Richter. Í Vestmannaeyjum hefur orðið vart við mikinn brennisteinsfnyk í bænum og kemur hann úr vesturátt.

Þyrlan send vegna umferðarslyss

Þyrla Landhelgisgæslunnar var kölluð vestur á Bíldudal klukkan sex í morgun vegna umferðarslyss sem átti sér stað klukkustund áður. Þá ók fólksbifreið í gegnum handrið á rimlahliði í útjaðri bæjarins. Tveir menn á þrítugsaldri voru í bílnum og flaug farþeginn í gegnum framrúðuna og lenti á viðardrumbi í hliðinu.

Tvisvar ekið á stólpa á sólarhring

Jeppa var ekið á stólpa sem er hluti af vegartálma á Vesturlandsvegi skammt frá Korpúlfsstöðum á sjötta tímanum í morgun. Ökumaður er grunaður um ölvun. Eitthvað virðist þessi vegartálmi þvælast fyrir ölvuðum ökumönnum því um svipað leyti í gær lenti annar bíll á stólpanum. Sá ökumaður reyndi að flýja af vettvangi en náðist skömmu síðar.

Íhugaði ekki afsögn

Átökin í Írak skyggja á upphaf flokksþings Verkamannaflokksins í Bretlandi í dag þar sem Tony Blair forsætisráðherra er forystusauður. Að sögn fjölmiðla þar í landi er Blair mikið í mun að beina kastljósinu að innanríkismálum í aðdraganda kosninganna í Bretlandi sem eiga að fara fram á næsta ári.

Stuðningur við Kerry dvínar

Stuðningur við John Kerry í forsetakosningunum í Bandaríkjunum virðist fara dvínandi. Kosningastjórar hans binda nú vonir við að vel gangi í fyrstu sjónvarpskappræðum frambjóðendanna sem haldnar verða í vikunni. 

Furðar sig á undanþágunefnd

Undanþágunefnd kennara og sveitarfélaga hefur hingað til synjað öllum undanþágubeiðnum vegna kennslu fatlaðra barna í yfirstandandi verkfalli grunnskólakennara. Halldór Gunnarsson, formaður landssamtakanna Þroskahjálpar, furðar sig á þessu.