Ný stólalyfta í Bláfjöllum

Verið er að reisa nýja 250 milljóna króna skíðalyftu í Bláfjöllum, þrátt fyrir mesta snjóleysi í manna minnum á skíðasvæðum höfuðborgarsvæðisins undanfarna vetur. En lyftan verður einnig notuð á sumrin, til að flytja ferðamenn og reiðhjólin þeirra upp á fjallstindana. Skíðasvæðið er í eigu tólf sveitarfélaga á höfuðborgarsvæðinu, sem munu punga út heilum 250 milljónum fyrir hana. Grétar Hallur Þórisson, forstöðumaður skíðasvæða höfuðborgarsvæðissins segir þetta stærsta skíðamannvirki sem reist hafi verið á landinu til þessa. Lyftan mun flytja 2500 manns á klukkustund, meira en tvöfalt fleiri en sú gamla. Biðraðir ættu því að vera úr sögunni, að sögn Grétars, en gamla lyftan verður líklega áfram í notkun um stund. Og í stað stóla er hægt að setja upp litla lokaða klefa á um helming nýju lyftunnar. Hann segir eina af hugmyndunum vera að nota lyftuna fyrir ferðamenn á sumrin. Til dæmis sé hægt að nota lyfturnar í hellaferðir og eins verði hægt að nota lyftuna til þess að flytja reiðhjól, þar sem hluti stólanna verði með þar til gerðar festingar. Síðustu tvo vetur hefur aðeins verið opið í 25 til 28 daga í Bláfjöllum, en árin þar á undan voru opnunardagarnir allt að 70. Grétar segir að það sé einmitt mikilvægt að þá fáu daga sem sé opið, þurfi fólk ekki að dúsa of lengi í biðröðum. Rétt innan við 40 þúsund manns hafi þó komið þá fáu daga sem opið var í fyrra. Eins séu þetta eðlilegar endurbætur, þar sem núverandi stólalyfta sé frá árinu 1978.