Þúsund ára ísjaki stal senunni

Fjórar sjónvarpsstöðvar og fjöldi franskra dagblaða voru viðstödd þegar 14 tonna ísjaki var hífður af vörubíl og komið fyrir utan við Palais de la Decouverte, franska vísindasafnið, klukkan fimm í gærmorgun. Sturla Böðvarsson samgönguráðherra og Sigríður Á. Snævarr, sendiherra í París, afhentu Frökkum ísjakann formlega. Síðdegis sama dag setti Halldór Ásgrímsson forsætisráðherra menningar- og vísindakynninguna formlega en hún stendur yfir í hálfan mánuð. "Það er stórkostlegt að sjá hann hérna á stéttinni," sagði Ari Trausti Guðmundsson, einn forsprakka vísindasýningarinnar í Palais de la Decouverte, "hugmyndin kom upp á fundi í sendiráðinu hérna í vor, og hér er hann!" Vonast er til að ísjakinn veki athygli á kynningunni sem að verulegu leyti er kostuð af frönskum stjórnvöldum. "Þetta fer vel af stað og vekur greinilega mikla athygli;" sagði Sturla Böðvarsson, ráðherra ferðamála. "Við vonum sannarlega að kynningin auki ferðamannastraum Frakka til Íslands og fjárfestingar," segir Sveinn Einarsson, verkefnisstjóri kynningarinnar. "Og vonandi átta Frakkar sig á því að það er menningarlíf á Íslandi sem er ástæða til að fylgjast með." Talið er að vatnið í isjakanum hafi fallið sem regn fyrir þúsund árum. Ef tillit er tekið til skekkjumarka gæti þetta regn hafa fallið einhvern tímann frá þeim tíma þegar Ingólfur Arnarson fann Ísland þar til Vilhjálmur Sigursæli lagði upp frá Frakklandsströndum og lagði undir sig Bretland 1066. Ekki hafa þó allir fagnað ísjakanum því græningjar í borgarstjórn Parísar komu í veg fyrir að hann yrði fluttur að ráðhúsi Parísar þegar "menningarnótt" hefst þar innan skamms. Þeir harma að ísjaki sé fluttur úr náttúrulegu umhverfi sínu á Íslandi og þó sérstaklega þá miklu orkusóun sem hafi átt sér stað við flutninginn frá Íslandi um Rotterdam til Parísar.