Játuðu brottkast

Skipstjóri og útgerðarmaður í Ólafsvík gengust undir það í Héraðsdómi Vesturlands að greiða hvor eina milljón króna í sekt fyrir brottkast. Verði sektin ekki greidd innan fjögurra vikna kemur þriggja mánaða fangelsi í stað sektarinnar. Mennirnir játuðu báðir að hafa í 129 veiðiferðum skipsins, frá október árið 1998 til ágúst árið 1999, varpað um það bil fimm og hálfu tonni af þorski í sjóinn. Voru mennirnir á dragnótarveiðum og vörpuðu kerfisbundið í sjóinn þorski undir þremur kílóum. Þannig hirtu þeir ekki, lönduðu né létu vega aflann samkvæmt lögum. Málinu lauk á grundvelli viðurlagaákvörðunar þar sem sakborningar féllust á að greiða sektarfjárhæð sem sækjandi lagði til.