Skákin heldur áfram

Þingmenn Framsóknarflokksins hittast á morgun og skipta með sér nefndarstörfum fyrir komandi vetur. Siv Friðleifsdóttir bætist í hóp óbreyttra og er hart deilt um hver eigi að víkja úr hvaða embætti fyrir hana. Af samtölum við þingmenn Framsóknar má ráða að töluverð gremja ríkir í þessum litla hóp og ekki allir sáttir hvor við annan. Á morgun munu flestir þingmenn þurfa að láta af verkefnum sem þeir hafa sinnt og eru þeim misjafnlega kær. Siv Friðleifsdóttir tekur á ný að sér hefðbundinn störf þingmanns og telja menn að hún eigi rétt á að fá einhverjar góða bita í ljósi ráðherradómsins sem hún missti. Fáir eru hins vegar tilbúnir að láta eitthvað eftir. Fréttastofan hefur heimildir fyrir því að reynt hafi verið að fá hana til að taka að sér varaformannssætið í efnahags- og viðskiptanefnd í stað Kristins H. Gunnarssonar en hún hafi hafnað því. Kristinn þótti óþægilegur liðsmaður flokksins í nefndinni á stundum og töldu menn sig slá tvær flugur í einu höggi með þessu, því nefndin telst þungaviktarnefnd. En það er ekki bara spurning um völd og áhrif því sumir hugsa líka um krónur og aura. Formennska í nefnd gefur aukatekjur svo og varaformennska í annað hvort fjárlaga- eða utanríkismálanefnd. Framsóknarmenn fara með formennsku í þremur nefndum og varaformennsku í utanríkismálanefnd. Fyrir utan þetta eru launuðu nefndirnar utan þings sem velflestir þingmenn nota til að hífa upp tekjurnar.