Óbætanlegt tjón

Listaverk eftir Ríkharð Jónsson urðu meðal annars fyrir barðinu á skemmdarvargi, sem svalaði skemmdarfýsn sinni í Byggðasafni Austur Skaftfellinga um helgina, þar sem óbætanlegt tjón var unnið. Lögreglunni barst vitneskja um innbrotið í gærmorgun, en þá var innbrotsþjófurinn á bak og burt. Björn Arnarsson safnvörður var þegar kallaður á vettvang. Hann segir aðkomuna hafa verið skelfilega. Þarna hafi verið glerbrot og munir á víð og dreif. Verk eftir Ríkharð Jónsson og Guðmund Einarsson frá Miðdal, séu mikið skemmd eftir innbrotið, sem og glermunir og skálar. Aðallega hafi einn salur orðið illa úti. Björn segir málið í rannsókn lögreglu og ekki sé enn vitað hvort fleiri en einn hafi verið að verki. Hann segir að sum verkanna sé ekki hægt að gera við og erfitt sé að meta tjónið til fjár. Viðgerðir séu bæði kostnaðarsamar og tímafrekar, enda sé ekki sama hvernig gert sé við verk af þessu tagi. Björn segir að sér hafi liðið hræðilega þegar hann sá útganginn og honum hafi verið skapi næst að setjast niður og gráta. Björn biður alla þá sem eitthvað kynu að vita um málið að láta lögregluna á Höfn strax vita.