Mótmæla veru Bandaríkjahers

93 framámenn í samfélagi múslima, sem eru andvígir veru Bandaríkjahers í Írak, hafa hvatt múslima um heim allan að styðja andspyrnu gegn herjum Bandaríkjanna og bráðabirgðastjórn Íraka sem tók við völdum í júní.

Ræninginn talaði norsku

Mikið lið lögreglu rannsakar nú rán á málverkum sem stolið var af Munch safninu í Osló í dag. Málverkin eru margra milljóna virði og eru eftir Edward Munch. Lögregla rannsakar nú bæði safnið sjálft og svo flóttabíl ræningjanna sem fannst stuttu eftir ránið mannlaus.

Ferðaþjónusta í Reykjarfirði

Um 500 manns hafa lagt leið sína í Reykjarfjörð á Vestfjörðum í sumar. Ferðamönnum þangað fjölgar ár frá ári, þrátt fyrir að enginn sé þangað vegurinn.

Kötlutangi enn syðsti oddinn

Kötlutangi heldur enn stöðu sinni sem syðsti oddi Íslands, þótt hann hafi minnkað verulega frá Kötlugosinu árið 1918. Dyrhólaey við Mýrdal, þessi viðfrægi klettur með gatinu, var löngum syðsti oddi Íslands. Það breyttist hins vegar í Kötlugosinu árið 1918 en hið gríðarlega hlaup sem þá rann fram Mýrdalssand bætti nokkrum kílómetrum við suðurströnd Íslands.

Börn læri á umferðina

Það er ekki nóg að kaupa nýja skólatösku, fín pennaveski, bækur og skólaföt, þegar stóri dagurinn rennur upp og börnin hefja skólagöngu. Það er ekki síður mikilvægt að brýna fyrir þeim að fara varlega í umferðinni.

Heimastjórnarhátíð fyrir almenning

Vestfirðingar héldu Heimastjórnarhátíð alþýðunnar í gær og var forseti Íslands, Ólafur Ragnar Grímsson, sérstakur gestur hátíðarinnar. Hátíðin hófst klukkan eitt í gær með því að kveikt var samtímis á kyndlum í sex byggðarlögum Ísafjarðarsýslna, í Bolungarvík, Súðavík, Þingeyri, Flateyri, Suðureyri og Ísafirði.

Vilja konu sem þjóðleikhússtjóra

Konur í leikhúsheiminum krefjast þess að kona verði næsti þjóðleikhússtjóri, en mikil spenna er um það hver hlýtur stöðuna. Á annan tug þekktra leikstjóra hyggst sækja um hana, en umsóknarfrestur er til mánaðamóta.

Ein nauðgun tilkynnt

Um 10 þúsund manns voru enn á götum Reykjavíkur í morgun og var varla þverfótað þar fyrir rusli. Stúlka um tvítugt kærði tvo menn fyrir nauðgun en þeir eru enn ófundnir.

Áratuga skref afturábak

Sigrún Magnúsdóttir, fyrrverandi oddviti Framsóknarflokksins í Reykjavík, segir að ákvörðun þingflokksins um að víkja Siv Friðleifsdóttur úr ríkisstjórn sé margra áratuga skref aftur á bak og brjóti í bága við stefnu Framsóknarflokksins. Það sé liðin tíð að fámenn karlaklíka geti stjórnað heilum stjórnmálaflokki.

Nauðgun skyggði á menningarnótt

"Það alvarlegasta sem gerðist og skyggir á Menningarnótt er nauðgun sem var kærð til lögreglu rétt eftir flugeldasýninguna. Talsverð ölvun var í miðborginni og einhverjir pústrar á milli manna en ekkert af því var alvarlegt," segir Geir Jón Þórisson, yfirlögregluþjónn í Reykjavík, eftir Menningarnótt og skemmtanahaldið sem tók við í framhaldinu.

Álag á farsímakerfum

Nokkuð var um að viðskiptavinir símafyrirtækjanna, sem staddir voru í miðbæ Reykjavíkur þegar dagskrá Menningarnætur stóð sem hæst, næðu ekki sambandi með farsíma.

Fullar fangageymslur

Alls komu 29 manns við í fangageymslum lögreglunnar í tengslum við skemmtanahald eftir Menningarnótt. Hluti þeirra stoppaði við í skemmri tíma á meðan þeir voru að ná áttum en aðrir dvöldu lengur.

Halldór kannast ekki við óánægju

"Ég get ekki séð hvernig því verður haldið fram að Framsóknarflokkurinn hafi staðið sig illa hvað þetta varðar," segir Halldór Ásgrímsson, utanríkisráðherra og formaður Framsóknarflokksins, vegna þeirrar ólgu sem verið hefur í flokknum vegna þeirrar ákvörðunar að víkja Siv Friðleifsdóttur úr ráðherraembætti þann 15. september.

Erfitt að gera betur en þetta

"Það sem hjálpaði mest við að gera Menningarnótt eins vel heppnaða og raun bar vitni var þetta dásamlega veður sem var allan daginn," segir Sif Gunnarsdóttir, verkefnastjóri Menningarnætur í Reykjavík. Hátíðinni lauk í fyrrakvöld með einni mestu flugeldasýningu sem sést hefur í borginni fyrir utan gamlárskvöld.

Fyrstu réttarhöldin í Guantanamo

Fjórir af föngum Bandaríkjahers í Guantanamo á Kúbu koma fyrir herdómstól í vikunni. Þetta verða fyrstu réttarhöldin yfir föngum í Guantanamo.

Grunur um raðmorð

Breska lögreglan telur ýmislegt benda til þess að Amelie Delagrange, sem var myrt í London á fimmtudaginn, hafi verið fórnarlamb raðmorðingja.

Stálu Ópinu og Madonnu

Hinu fræga málverki Edvards Munch, Ópinu, var stolið frá Munch-safninu í Ósló í gær ásamt fleiri málverkum. Meðal þeirra var annað frægt verk eftir Munch, og heitir það Madonna. Tveir eða þrír vopnaðir menn gengu inn í safnið, hótuðu starfsfólki með byssum og fóru með málverkin út í bifreið sem beið fyrir utan safnið.

Rúnar Alexandersson í sjöunda sæti

Rúnar Alexandersson fimleikamaður keppti í gærkvöld í úrslitum á bogahesti á Ólympíuleikunum í Aþenu. Rúnar hlaut einkunnina 9.725 og varð í sjöunda sæti af þeim átta sem komust í úrslit.

Hrun í stofni holugeitunga

Eitthvað varð til þess í náttúrufari landsins að mun minna er af holugeitungi nú síðsumars en útlit var fyrir í vor. "Það hefur eitthvað gerst, en ég hef ekki hugmynd um hvað," segir Erling Ólafsson, skordýrafræðingur á Náttúrufræðistofnun Íslands.

Berast með grænmeti og ávöxtum

Erling Ólafsson, skordýrafræðingur á Náttúrufræðistofnun Íslands, kannast ekki við að nýjar tegundir kóngulóa séu að nema hér land, en nýverið greindi DV frá því að fólk í Grafarvogi hefði rýmt hjá sér hús og látið eitra vegna ókennilegrar svartrar kóngulóar.

Fundur Framsóknarkvenna færður

Hópur Framsóknarkvenna ætlar að hittast og ráða ráðum sínum í hádeginu í dag vegna þeirrar ákvörðunar Halldórs Ásgrímssonar, formanns flokksins að víkja Siv Friðleifsdóttur úr ríkisstjórn. Upphaflega stóð til að halda fundinn í Iðnó, en eftir að Stöð 2 sagði frá fundinum í fréttum í gærkvöldi ákváðu konurnar að flytja fundinn til og vilja talsmenn þeirra ekki upplýsa hvar hann verður haldinn.

Afhenda Sistani moskuna

Liðsmenn Moqtada al-Sadr munu afhenda al-Sistani æðsta klerk sjíta, Ali moskuna í Najaf í Írak. Enn er á huldu hvar al-Sadr sjálfur heldur sig. Misvísandi fregnir berast þó enn af stöðu mála.

Viðbúnaður á Menningarnótt

Slökkvilið höfuðborgarsvæðisins og lögreglan í Reykjavík verða með stjórnstöð, viðbragðslið og búnað á afgirtu svæði við Arnarhól á Menningarnótt. Þaðan verða gerð út tæki og mannskapur ef á þarf að halda í tengslum við viðburði kvölds og nætur.

Höfðar mál gegn fangelsi

Bretinn Richard Reid, sem dæmdur var í lífstíðar fangelsi, fyrir að gera tilraun til að sprengja farþegaflugvél American Airlines, með sprengiefni sem hann kom fyrir í skóm sínum, hefur höfðað mál gegn bandarískum fangelsismálayfirvöldum.

Búist við 100 þúsund manns

Búast má við að hátt í 100 þúsund manns taki þátt í Menningarnótt í Reykjavík, sem haldin er í níunda sinn í dag. Dagskráin hefst klukkan ellefu þegar Árni Þór Sigurðsson, forseti borgarstjórnar, setur Menningarnótt formlega og ræsir Reykjavíkurmaraþon í Lækjargötu.

Læknar sakaðir um pyntingar

Alvarlegar ásakanir um misþyrmingar gagnvart föngum eru settar fram í hinu virta læknatímariti Lancet, á hendur læknum og hjúkrunarfólks innan bandaríkjahers. Blaðið birtir upplýsingar úr gögnum frá stjórnvöldum sem gefa til kynna að heilbrigðisstarfsfólkið beri ábyrgð á slæmri meðferð fanga í Abu Graib fangelsinu í Írak, og hafi einnig gengið í skrokk á föngunum, líkt og fangaverðirnir.

Lagði hald á 400 grömm

Lögreglan í Hafnarfirði lagði í gærkvöldi hald á tæp 400 grömm af fíkniefnum, sem fundust í húsi í bænum. Þetta var einkum hass en einnig lítilræði af amfetamíni. Einn maður var handtekinn en síðan sleppt að lokinni yfirheyrslu.

Heimastjórnarhátíð fyrir almenning

Heimastjórnarhátíð alþýðunnar verður haldin á Ísafirði í dag. Sigurður Pétursson, einn af skipuleggjendum hátíðarinnar, segir að vegna þess að heimastjórnarhátíðin í vetur hafi verið bundin við ákveðna hópa í þjóðfélaginu hafi verið ákveðið að halda hátíð fyrir allan almenning.

Átök við borgina Hilla

Pólskur hermaður lést og sex aðrir slösuðust þegar bíll var sprengdur við bílalest hersveitarinnar við borgina Hilla í Írak. Þar með er tala látinna pólskra hermanna komin í 14 frá september þegar Pólland tók við stjórn átta þúsund manna alþjóðlegum her í Írak. Þetta var þriðja árásin á herliðið á skömmum tíma.

Vill banna auglýsingarnar

John Kerry, forsetaframbjóðandi demókrata, hefur lagt fram beiðni til bandarísku kosningastjórnarinnar, að banna auglýsingar sem birtar hafa verið í sjónvarpi þar sem köstuð er rýrð á feril hans sem hermanns í Víetnam stríðinu.

Tvær sprengjur í strandbæ

Tvær sprengjur sprungu í ruslagámum í tveimur strandbæjum á Norðvesturströnd Spánar fyrir um það bil klukkustund. Varað var við sprengjunum í símtali til dagblaðs í Baskalandi og staðhæft að aðkilnaðarsamtök Baska, ETA, bæru ábyrgð á þeim. Ekki er vitað hvort einhverjir hafi særst í sprengingunum.

Fjölmennasta Maraþon til þessa

Fjölmennasta Reykjavíkurmaraþon til þessa stendur nú yfir. Þorfnnur Ómarsson, fréttamaður er staddur í miðborg Reykjavíkur. Hann segir erfitt að segja nákvæmlega hve margir taka þátt í hlaupinu þar sem mikill fjöldi fólks skráði sig í morgun. Telur hann líklegt að góða veðrið hafi dregið fólk á fætur.

Átök við Ali moskuna í morgun

Til átaka kom við Ali moskuna í Najaf í Írak í morgun, á milli Bandaríkjahers og Medi-hers sjítaklerksins Moqtadas al-Sadrs. Al-Sadr hefur gefið frá sér yfirráð yfir Imam Ali grafhýsinu, en Ali moskan er þó enn á valdi manna hans.

Fótboltallið Írak gagnrýnir Bush

Knattspyrnulið Íraka sem vann riðil sinn á Ólympíuleikunum, hefur gagnrýnt Bush Bandaríkjaforseta harðlega fyrir að nota liðið í auglýsingum fyrir kosningabaráttu sína. Margir liðsmenn eru Bush mjög reiðir og sagði einn þeirra að ef hann væri ekki á Ólympíuleikunum væri hann heima að berjast gegn bandaríska herliðinu.

3800 tóku þátt í Maraþoni

Um 3.800 manns tóku þátt í Reykjavíkurmaraþoni, sem enn stendur yfir í miðborg Reykjavíkur. Hlaupið hófst klukkan ellefu í morgun en ekki er búist við síðustu keppendum í mark fyrr en síðar í dag.

Sprenging í Bangladesh

Að minnsta kosti fjórir létust í Bangladesh í dag þegar ein eða fleiri sprengjur sprungu við höfuðstöðvar helsta stjórnarandstöðuflokks landsins í höfuðborginni Dhaka á sama tíma og fyrrverandi forsætisráðherra landsins ávarpaði fund sem þar stóð yfir.

Miðborgin meira og minna lokuð

Miðborg Reykjavíkur hefur meira og minna verið lokað fyrir bílaumferð. Þannig eru allar götur í Kvosinni eingöngu ætlaðar gangandi vegfarendum í dag og í kvöld. Lækjargata er lokuð, Fríkirkjuvegur og Vonarstræti eru lokaðar allri bílaumferð nema strætisvögnum.

Fuglaflensuveiran finnst í svínum

Vísindamenn í Kína telja sig hafa fundið hina skæðu fuglaflensuveiru í svínum þar í landi, og segjast þeir hafa fundið hana á nokkrum bóndabæjum í Kína. Yfir 20 manns létust og um 200 milljónir fuglar voru drepnir, þegar fuglaflensufaraldur gekk yfir Asíu fyrr á þessu ári.

Lögreglukór og vatnadansmeyjar

Lögreglukórinn mun syngja kl. 18 á menningarnótt bæði fyrir utan og utan á lögreglustöðinni við Hlemm. Vatnadansmeyjafélagið Hrafnhildur mun jafnframt sýna listir sínar og yndisþokka. En Lögreglukórinn og Vatnadansmeyjafélagið Hrafnhildur, hafa einu sinn áður leitt saman hesta sína. Vinnupallar eru á lögreglustöðinni vegna viðhalds og verða þeir nýttir sem sviðsmynd.

Starfslið SÞ ætti að fara

Starfsmannasamtök Sameinuðu þjóðanna telja að allt starfslið Sameinuðu þjóðanna í Afganistan eigi að yfirgefa landið þar sem þeim sé hætta búin. Líklegt þykir að starfsmenn Sameinuðu þjóðanna verði skotmörk þegar líður að kosningum í landinu í október. Þá verður kosinn nýr forseti, en ný stjórn verður kosin í apríl á næsta ári.

Reyndu að komast til Spánar

Sextíuogfjórir Marokkóbúa voru handteknir þegar þeir reyndu að smygla sér ólöglega á litlum gúmmíhraðbáð til Spánar. Hraðbáturinn var stöðvaður við strendur Marokkó í gær og voru allir um borð handteknir vegna gruns um að vilja flýja til Evrópusambandsins.

Átök blossa upp á ný

Átök blossuðu upp milli bandarískra hersveita og herskárra sjítamúslima í Najaf í dag, en nokkuð friðsælt var fram eftir degi í þessari heilögu borg múslima. Mannlaust flugfar brotlenti í borginni og segja stuðningmenn sjítaklerksins al-Sadr að þeir hafi skotið farið niður.

Lýsa stuðningi við ráðherraval

Stjórnir allra Framsóknarfélaga í Reykjavíkurkjördæmi norður lýsa í ályktun stuðningi við þá niðurstöðu sem varð í ráðherravali Framsóknarflokksins. Í ályktun félaganna segir að formaður og þingflokkur Framsóknarflokksins hafi tekið erfiða en óhjákvæmilega ákvörðun, að skipa ráðherra í væntanlega ríkisstjórn undir forsæti Halldórs Ásgrímssonar.

Flugsýning í Búdapest

Óvenju hugaðir flugmenn, hvaðanæva úr veröldinni, sýndu snilli sína á flugsýningu í Búdapest, höfuðborg Ungverjalands. Þeir gerðu sér lítið fyrir og flugu meðal annars undir brúna yfir Dóná, sem er í nágrenni ráðhússins í borginni.

Mótorhjól til styrktar börnum

Harley Davidson klúbburinn á Íslandi greip til nýstárlegrar fjáröflunar í dag í tengslum við menningarnótt í Reykjavík. Félagar í klúbbnum, sem eðli málsins samkvæmt eiga Harley Davidson mótórhjól, buðu hverjum sem prófa vildi að fara í stuttan ökutúr sem farþegi á Harley Davidson.